Jetzt läuft:

The Rubettes Sugar Baby Love
  • Jetzt läuft:

    The Rubettes Sugar Baby Love
  • Davor lief:

  • Um> 07:23 Uhr lief: Heinz Rudolf Kunze Dein Ist Mein Ganzes Herz
  • Um> 07:20 Uhr lief: Creedence Clearwater Revival Proud Mary
  • Um> 07:13 Uhr lief: Rea Garvey Wild Love
  • Um> 07:10 Uhr lief: Taylor Dayne Tell It To My Heart
  • Um> 06:57 Uhr lief: Barry White Let The Music Play
  • Um> 06:54 Uhr lief: Sunrise Avenue Hollywood Hills
  • Um> 06:51 Uhr lief: The Beatles Eight Days A Week
  • Um> 06:45 Uhr lief: Carly Simon All I Want Is You
  • Um> 06:39 Uhr lief: Justin Bieber Love Yourself

Der Morgen mit Britta Uphoff

Plattdeutsche Nachrichten Plattdüütsche Narichten vun'n 5. Februar 2021

Plattdüütsche Narichten vun'n 5. Februar 2021

Audio vom 5. Februar 2021
Plattdeutsche Nachrichten
Bild: Radio Bremen

Länder schüllt keen Impfstoff trüchhollen +++ EU-Kommischoonspräsidentin gifft Fehler to +++ Tall vun Corona-Neeinfekschonen in Düütschland geiht wieter trüch +++ Senatersche denkt över Testplicht in Bremer Pleeghüüs na +++ Bremer Mercedes-Wark maakt Sluss mit Kortarbeit +++ Dat Weer

Informationen zum Audio

Länder schüllt keen Impfstoff trüchhollen

Berlin: Bunnsgesundheitsminister Spahn fordert de Länder dorto op, datt se den Impfstoff vun Astrazeneca heel un deel upbruken schüllt. Se schüllt nix för dat twete Impfen trüchhollen, säe Spahn. So könen in de eersten dree Februarweken 1,7 Millionen Minschen mit Anrecht op de eerste Sprütt versörgt warrn. Bi Studien in Grootbritannien is rutsuert, datt de Impfschutz nich nalett, ok wenn de twete Dosis düütlich later geven ward.            

EU-Kommischoonspräsidentin gifft Fehler to

Brüssel: EU-Kommischoonspräsidentin von der Leyen gifft Fehler bi dat Rankriegen vun Impfstoff to. De EU hett de Probleme bi dat Herstellen vun Impfstoff to minn taxeert, säe von der Leyen to de „Süddüütschen Zeitung“. „En Land kann en Snellboot ween. De EU is mehr en Tankschipp“, so ehr Wöör. Se hebbt sik to düchtig up de Fraag konzentreert, wat dat en Impfstoff geven ward, un nich so sehr op dat Entwickeln. De Europääsche Union harr lever över de grode Opgaav vun de Massenprodukschoon nadenken schüllt.  

Tall vun Corona-Neeinfekschonen in Düütschland geiht wieter trüch

Berlin: De Corona-Infekschoonstallen in Düütschland gahn wieter daal. As dat Robert-Koch-Institut vermellt, gifft dat üm un bi 12.900 nee’e Infekschonen mehr as güstern. Dat sünd 1.100 weniger as verleden Freedag. 855 wietere Minschen sünd an oder mit dat Virus doodbleven. In’t Land Bremen gifft dat 102 Neeinfekschonen, 44 dorvun in Bremerhaben. In Neddersassen sünd meist 1.200 Minschen positiv op dat Virus test worrn.

Senatersche denkt över Testplicht in Bremer Pleeghüüs na

Bremen: Bremens Sozialsenatersche Stahmann denkt över en Testplicht för Besökers in Pleeghüüs na. Grund dorför is de hoge Tall vun Doden in de Pleeg-Inrichtungen in’t Land. Betto ward blots dat Personaal tweemal per Week test. In’n Momang köönt de Pleeghüüs sülbens fastleggen, wat se de Besökers testen oder nich.         

Bremer Mercedes-Wark maakt Sluss mit Kortarbeit

Bremen: Na een Week Kortarbeit fohrt dat Bremer Mercedes-Wark sien Produkschoon wedder hooch. De Autoboer harr de Produkschoon för en kotte Tiet daalschruuvt, wiel de Toleverers nich achterna kamen sünd. De Warke in Bremen un Rastatt levern nu wedder na Plaan, hett Daimler vermellt. Wenn nödig, wüllt se aver ok in Tokunft op sükse Probleme reageern. Mercedes is jüst so as VW un Audi in de Kniep, wiel Elektronikchips in’n Momang to knapp sünd. De Bunnsregeern versöcht nu, wietere Chips ut Taiwan to kriegen.   

Dat Weer

Un nu en Blick op dat Weer: In Nordholt un Wiesmoor 0, an’n Bremer Flegerhaben un in Bremerhaben 1, in Deefholt 2, un in Ossenbrügge sünd dat opstünns 3 Graad. Hüüt hollen sik de dichten Wulken in use Gegend. Hier un dor kann dat ok dakig-gries ween. Över Dag kummt vun Westen her af un an’n beten Snee oder Regen. Toeerst blifft dat aver ok för en längere Tiet mal dröög bi 1 bet 3 Graad. In de Nacht is dat deegt wulkig, un af un an fallt Snee. Vun Oostfreesland bet to de Wümm un in’n Süden vun Bremen kann dat ok Spütterregen mit de Gefohr vun Glatties geven. De Temperaturen gah daal op -1 bet -3 Graad. Morgen wiest sik eerst noch af un an de Sünn, besünners an de Küst. Över Dag trecken vun Süden her jümmer mehr dichte Wulken op, de later ok Snee bringen köönt. In Bremen un wieter in’n Norden blifft dat wohrschienlich bet to’n Avend dröög. Dat Thermometer wiest twüschen -2 un 0 Graad.

Dat weern de Narichten op platt. Tohoopstellt hett se Katrin Martens. Op Platt trechtmaakt un vörleest vun Marc Gelhart.