Plattdeutsche Nachrichten Plattdüütsche Narichten vun'n 4. Februar 2021

Regerungskoalitschoon nickt nee’e Corona-Hölp af

Berlin: De Regerungskoalitschoon hett en nee’e Corona-Hölp afnickt. CDU, CSU un SPD hebbt sik dorop eenigt, datt Familien en Kinnerbonus in de Höögde vun 150 Euro per Kind kriegen. De glieke Summ kriegen ok Minschen, de blots vun de Grundsekerung leven. De Mehrwertstüer vun 7 Perzent för Spiesen in Gasthüüs ward bet to’t Enn vun’t tokamen Johr wieter lopen laten.            

Bremer Gesundheitsbehöörd mellt fief wietere Corona-Dode

Bremen: De Bremer Gesundheitsbehöörd hett fief wietere Corona-Dode vermellt. Bavento sünd in Bremen un Bremerhaben 105 nee’e Covid-19-Infekschonen noteert worrn. De so nöömte Söben-Daag-Inzidenz liggt in de Stadt Bremen bi 80, in Bremerhaben bi 113. Neddersassen mellt meist 1.100 Neeinfizeerte bi en Inzidenz vun 77.   

Bremer Ruumfohrtkonzern OHB verklaagt Europääsche Union

Bremen: De Bremer Ruumfohrtkonzern OHB verklaagt de Europääsche Union. Dorachter stickt dat Boen vun nee’en Satelliten för dat Navigatschoonssystem Galileo. Betto sünd de vun OHB boet worrn. In Tokunft geiht düsse Opdrag an Airbus un Thales.

Grootdörsöken in Bremen, Bremerhaben un Neddersassen

Bremen: In Bremen, Bremerhaben un Neddersassen geev dat hüüt Morgen grode Dörsökens-Insatzen. Na Utkunft vun de Polizei geiht dat dorbi üm dat Smuggeln vun Wapen un üm Drogenhannel. Alltohoop sünd 15 Hüüs un Wahnungen dörsöcht worrn. Dorbi is ok en Vermögen vun över twee Millionen Euro sekerstellt worrn, as en Spreker vun de Polizei vermellt. In’n Insatz weern ok Spezialtruppen ut anner Bunnslänner.         

Överraschen in’n DFB-Pokaal

Regensborg: Bi’n DFB-Pokaal geev dat en grode Överraschen: De Tweetligist Jahn Regensborg hett gegen den Bunnsligisten Köln mit 4:3 na dat Ölben-Meter-Scheten wunnen. De VfL Wolseburch is mit en 1:0 gegen Schalke 04 een Runn wieterkamen. Borussia Mönchengladbach hett den VfB Stuttgart mit 2:1 besiegt. Ok in’t Viddelfinaal kamen is de RB Leipzig mit en 4:0 gegen den Tweetligisten VfL Bochum.  

Dat Weer

Un nu en Blick op dat Weer: In Cuxhaben un op Spiekeroog 0, an’n Bremer Flegerhaben un in Bremerhaben 1, in Deefholt 6, un in Ossenbrügge sünd dat opstünns 7 Graad. Hüüt riet de griese Wulkendeek meist gor nich op. De Regen lett aver mit de Tiet na, jüst so as de Snee un Sneeregen twüschen Werser un Elv. Över Dag gifft dat ok fakener mal dröge Tieden. De Temperaturen liggen twüschen 2 un 6 Graad. In de Nacht blifft dat dicht wulkig, aver meisttiets dröög. In’n Verloop is hier un dor lichter Sneefall mööglich. Dat Thermometer sackt daal op 1 bet -2 Graad. Morgen geiht dat dicht wulkig wieter. Över Dag kann dat vun Westen her’n beten Snee oder Regen geven bi 0 bet 3 Graad.

Dat weern de Narichten op platt. Tohoopstellt hett se Ralph Stölting. Op Platt trechtmaakt un vörleest vun Marc Gelhart.