Jetzt läuft:

Justin Bieber Love Yourself
  • Als nächstes läuft:

  • Um 06:45 Uhr läuft: Carly Simon All I Want Is You
  • Jetzt läuft:

    Justin Bieber Love Yourself
  • Davor lief:

  • Um> 06:34 Uhr lief: Golden Earring Radar Love
  • Um> 06:25 Uhr lief: Patrick Swayze She's Like The Wind
  • Um> 06:20 Uhr lief: Don McLean American Pie
  • Um> 06:16 Uhr lief: Eurythmics Who's That Girl?
  • Um> 06:09 Uhr lief: Bruno Mars Grenade
  • Um> 06:05 Uhr lief: Talk Talk It's My Life
  • Um> 05:58 Uhr lief: Dusty Springfield Son Of A Preacher Man
  • Um> 05:54 Uhr lief: Queen These Are The Days Of Our Lives
  • Um> 05:49 Uhr lief: Rosenstolz Ich Bin Ich (Wir Sind Wir)

Der Morgen mit Britta Uphoff und Marcus Rudolph

Plattdeutsche Nachrichten Plattdüütsche Narichten vun'n 3. Februar 2021

Plattdüütsche Narichten vun'n 3. Februar 2021

Audio vom 3. Februar 2021
Plattdeutsche Nachrichten
Bild: Radio Bremen

Na Ordeel gegen Nawalny: Vele reegt sik op +++ Merkel: Dat mööt wi dörstahn +++ 7-Daag-Tall geiht in Düütschland wieder trüch +++ Mann, de Amazon opsett hett, gifft dat Leit ut de Hand +++ Bremers kriegt FFP2-Masken +++ Dat Weer

Informationen zum Audio

Na Ordeel gegen Nawalny: Vele reegt sik op

Brüssel: Dat de Kreml-Kritiker Nawalny in’t Kaschott mutt, dor sünd vele nich mit inverstahn. EU-Kommischoons-Baas von der Leyen hett vun Russland verlangt, se schüllt den Mann stantepe freelaten. Bunnsbutenminister Maas sä: Dat Ordeel weer en Slag gegen de Rechtsstaats-Idee in Russland. En Gericht in Moskau harr Nawalny güstern för dreeenhalv Johr achter Trallen schickt. Seggt warrt: He harr Oplagen in sien Bewährungstiet nich inhollen. As dat Ordeel rut weer, sünd glieks Dusende Minschen in Moskau op de Straat gahn.

Merkel: Dat mööt wi dörstahn

Berlin: Bunnskanzlersch Merkel is nich dorför, gau de Corona-Regeln to lockern. Dat weer keen goden Kurs, wenn een eerst 14 Daag lang allens apen maakt un de Tallen vun kranke Minschen denn stracks wedder na baven gaht, meen Merkel in de ARD. Tokamen Week warrt de Kanzlersch wedder mit de Baaslüüd vun de Länner de Laag besnacken. Ok wull se sik nich dor op inlaten, dat bi dat europääsche Impfprogramm nich allens löppt. Allens in allen weer, so Merkel, nix ut’n Kurs lopen.

7-Daag-Tall geiht in Düütschland wieder trüch

Berlin: Dat Robert-Koch-Institut hett vermellt: 9.700 Minschen hebbt sik nee mit Corona ansteken. Dat sünd 3.500 weniger as vör ene Week. 975 Minschen sünd an oder mit Corona dootbleven. De 7-Daag-Tall is kloor na ünnen gahn. Se steiht nu bi knapp 83. In’t Land Bremen hebbt se 103 ne’e Corona-Kranke tellt. Fief Minschen mehr sünd hier an dat Virus storven. De 7-Daag-Tall liggt in Bremen bi 81, in Bremerhaven bi 101.

Mann, de Amazon opsett hett, gifft dat Leit ut de Hand

Washington: Jeff Bezos, dat is de Mann, de Amazon opsett hett, will nich länger Vörstands-Baas ween. In dat drüdde Viddeljohr will he dat Leit ut de Hand geven. Övernehmen schall dat Andy Jassy. He is bet nu för dat Cloud-Geschäft tostännig. Bezos will geschäftsföhren Vörsitter vun den Verwaltungsraat blieven. He warrt also ok in Tokunft den Kurs vun den Kunzern stüern. Sien Geld un Goot warrt op meist 190 Milliarden Dollar taxeert. Ünner de rieksten Lüüd is Bezos opstunns de Nummer Twee.

Bremers kriegt FFP2-Masken

Bremen: Noch düsse Week will Bremen de eersten FFP2-Masken rutschicken. All Börgerslüüd vun 16 op an kriegt fief vun düsse Masken. Betahlen mööt se nix. Dat harr de Senat an’t Enn vun Januar fastleggt. Mitt Februar schüllt denn all Lüüd so’n Masken hebben.

Dat Weer

Un woans süht dat mit dat Weer umto ut? Opstunns hebbt wi in Bremerhaven un op Spiekeroog 1 Graad, in Bremen sünd dat 2 un in Ossenbrügge 9 Graad. Vundaag: Dichte Wulken, un af un an pladdert dat ok. An’n Vörmiddag treckt Frost un Snee af. Dat warrt warmer. Dat Thermometer krabbelt op 2 bet 7 Graad. De Wind dorto weiht flau oder en beten mehr vun de süden bet oosten Kant, laterhen noordoost. Tokamen Nacht: Wulken, un regen kann dat ok. To’n Deel kann ok wedder Sneeregen oder Snee daalkamen. Vör allen gegen Morgen kann dat glatt warrn. Bi 3 bet 0 Graad. Morgen pliert twüschen de griesen Wulken ok mal de Sünn rut: Eerst pladdert dat noch, twüschen Werser un Elv eerst ok noch mit Snee oder Sneeregen, denn aver warrt dat dröög. Dat Ganze bi 2 bet 7 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Katrin Martens.