Jetzt läuft:

Don McLean American Pie
  • Als nächstes läuft:

  • Um 06:28 Uhr läuft: Juice Newton Queen Of Hearts
  • Jetzt läuft:

    Don McLean American Pie
  • Davor lief:

  • Um> 06:16 Uhr lief: Eurythmics Who's That Girl?
  • Um> 06:09 Uhr lief: Bruno Mars Grenade
  • Um> 06:05 Uhr lief: Talk Talk It's My Life
  • Um> 05:58 Uhr lief: Dusty Springfield Son Of A Preacher Man
  • Um> 05:54 Uhr lief: Queen These Are The Days Of Our Lives
  • Um> 05:49 Uhr lief: Rosenstolz Ich Bin Ich (Wir Sind Wir)
  • Um> 05:46 Uhr lief: Level 42 Lessons In Love
  • Um> 05:42 Uhr lief: Supertramp Dreamer
  • Um> 05:38 Uhr lief: James Blunt Heart To Heart

Der Morgen mit Britta Uphoff und Marcus Rudolph

Plattdeutsche Nachrichten Plattdüütsche Narichten vun'n 2. Februar 2021

Plattdüütsche Narichten vun'n 2. Februar 2021

Audio vom 2. Februar 2021
Plattdeutsche Nachrichten
Bild: Radio Bremen

Spahn rekent mit nich mehr Impfmiddel +++ Impf-Top-Drepen un wat de Politik dorto seggt +++ Weniger Lüüd mit Corona ansteken +++ Corona-Kranke bi Frosta +++ AfD in Sachsen: Verdacht op Extremismus +++ Dat Weer

Informationen zum Audio

Spahn rekent mit nich mehr Impfmiddel

Berlin: Gesundheitsminister Spahn rekent ok na dat Top-Drepen vun Bund un Länner nich dormit, dat de nödigen Corona-Impfmiddel gau kaamt. All, de bi dat Drepen mit bi weren, hebbt begrepen: Bet April gifft dat noch Weken, in de dat hier un dor böös kniepen warrt, sä Spahn in de ARD. Eerst in dat twete Viddeljohr warrt dat kloor mehr Impfmiddel geven.

Impf-Top-Drepen un wat de Politik dorto seggt

Berlin: Lüüd, de güstern bi dat Top-Drepen gegen Corona mit bi weren, seht dat, wat ünner’n Streek steiht, ünnerscheedlich. Bremens Börgermester Bovenschulte meen, dat weer goot, breet över de Saak to snacken. Dat se nu planen köönt, dorför weer dat Drepen wichtig ween, sä de Ministerpräsidentin vun Rheinland-Pfalz Dreyer. De Baas-Fro vun Mekelnborg-Vörpommern Schwesig hett bekriddelt: Seken planen kunnen se blots bet to den 20. Februar.

Weniger Lüüd mit Corona ansteken

Berlin: De Gesundheitsämter in Düütschland hebbt tellt: In de verleden 24 Stunnen hebbt sik um un bi 6.100 Minschen mit Corona ansteken. Dat sünd 300 weniger as Deensdag vör ene Week. 861 Minschen sünd in desülvige Tiet an oder mit Corona dootbleven. De Söven-Daag-Weert liggt in ganz Düütschland bi 90, woneem se henwüllt, dat is en Tall ünner 50.

Corona-Kranke bi Frosta

Bremerhaven: Bi den Bedriev för Deepköhl-Eten Frosta hebbt se Corona faststellt. Bet nu weet se vun 30 Lüüd, de sik ansteken hebbt. De Krisenkoppel in Bremerhaven meent: Dat is nich so, dat dat gau mehr warrt. Liekers müssen se en Oog op de Saak hebben.

AfD in Sachsen: Verdacht op Extremismus

Dresden: Bi den Verfatensschutz in Sachsen gellt för den Lannsverband vun de AfD nu de Verdacht op Rechtsextremismus. De Partei kunnen se nu op de Oort vun en Narichtendeenst kuntrulleren. Bi’t Telefoneren kunn de Verfatensschutz mithören, oder se kunnen verdeckte Ermittler insetten. Dat hebbt Medien to weten kregen, de Staat seggt dor noch nix to.

Dat Weer

Un woans süht dat mit dat Weer umto ut? Opstunns hebbt wi in Staad 2 Graad ünner 0, in Bremen un Bremerhaven is dat 1 Graad ünner 0 un in Vechte 0 Graad. Vundaag: An’n Vörmiddag treckt sik de Wulken tohoop, un an’n Namiddag kann ok Natts vun baven kamen: Eerst as Snee, denn as Sneeregen un Regen. Dat Thermometer krabbelt op 1 bet 3 Graad. Dat kann glatt warrn. De Wind dorto weiht flau vun de oosten bet süüdooosten Kant. Tokamen Nacht: Dat regent. Blots bi Cuxhaven kann ok noch Sneeregen oder Snee daalkamen. Un dat bet to’n Morgen. An’n Avend 1 Graad över 0 bet 0 Graad, achteran warrt dat en lütt beten warmer. Morgen: Vele Wulken, pladdern kann dat ok. Blots ganz in’n Norden mengeleert sik dor en beten Snee twüschen. Dat warrt warmer mit 3 bet 7 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Ulrike Müller.