Plattdeutsche Nachrichten Plattdüütsche Narichten vun'n 12. Mai 2023

Ein rot-weißer Leuchtturm zwischen Dünen. Dahinter ein blauer Himmel mit ein paar Wolken.

Plattdüütsche Narichten vun'n 12. Mai 2023

  • Iesenbahn- un Verkehrsgewarkschop will wieder streiken
  • Wesertunnel kann viellicht dürer weern, as dat plant weer
  • Bedrievsraat vun de Lloyd-Warft is inverstahn mit Instieg vun de Lürssen-Grupp
  • Politprominenz makt Wahlkampf in Bremen
  • Twitter-Baas Musk will dat Stüer ut de Hand geven
  • Dat Weer
Bild: Radio Bremen

Informationen zum Audio

Iesenbahn- un Verkehrsgewarkschop will wieder streiken

Berlin. De Iesenbahn- un Verkehrsgewarkschop EVG hollt an ehren Streikplans fast. An´n Avend harrn sick EVG un Düütsche Bahn noch eenmal drapen, üm een Utweg in den Tarifstriet to finnen. Vun de Bahn is to hören, dat se op dat Verlangen, den Minnstlohn na´t Gesett, as Grundlaag in´n Verdrag to schrieven, togahn will. De EVG süht ehr Verlangen aver wieder nich nakamen.

Wesertunnel kann viellicht dürer weern, as dat plant weer

Bremen. De Bo vun den Wesertunnel kann viellicht mit dat fardig boen vun de A281 in Bremen 400 Millionen Euro dürer weern. Dat vermellt de Weser Kurier. As dat in de Zeitung steiht, is de Bund nich praat dormit, dat extra Geld to akzepteren. Wenn dat ganz gräsig löppt, bedüüdt dat dat Ut för en dichten Autobahnring. De Börgermeister vun Bremen Bovenschulte see in en Snack mit Radio Bremen: He rekend dormit, dat de Bund dat Geld för de Autobahn förwiss övernehmen deit. Dorto warrt de Stadt Druck op den Bund maken.

Bedrievsraat vun de Lloyd-Warft is inverstahn mit Instieg vun de Lürssen-Grupp

Bremerhaben. De Gewarkschop un de Bedrievsrat vun de Lloyd-Warft sünd bannig inverstahn mit den planten Instieg vun de Lürssen-Grupp ut Bremen. Dordör warrt de Steed wieder seker makt, dat vermellt de IG Metall. De Schangs för Neeboprojekte warrt wohrschienlich stiegen. Lürssen will mit 25 Perzent wat an de Warft in Bremerhaben dortogeven.

Politprominenz makt Wahlkampf in Bremen

Bremen. To´n Afsluss vun de Börgerschaftswahl in Bremen kummt an´n Namiddag Bunnskanzler Scholz na Bremen. Op den Marktplatz steiht Scholz de SPD an de letzten Daag vör de Wahl bi. Bet op den Kanzler sünd denn ok de Bunnsvörsitters vun de Sozialdemokraten – Esken un Klingbeil – dorbi, as ok de Ministerpräsident vun Neddersassen Weil. För de FDP kamen an´n Avend de beiden Viez-Bunnsvörsitters Vogel un Kubicki to´n Afsluss vun den Wahlkampf na Bremen.

Twitter-Baas Musk will dat Stüer ut de Hand geven

Los Angeles. Elon Musk hett wedder vermellt, as Twitter-Baas dat Stüer ut de Hand to geven. He hett en Fro funnen, de dat Amt övernehmen deit. Dat schrifft he bi den Kortnarichtendeenst. Se warrt in so söss Weken dat Amt övernehmen. En Naam hett he nich seggt. Musk will sick as Technikvörstand üm Geschäftsrebeten as Produkte un Software kümmern. De Milliardär harr Twitter in´n verleden Oktober för 44 Milliarden Dollar övernahmen.

Dat Weer

Un nu noch en Blick op dat Weer: in Achim 17, in Bremen-Mitt 15, in Bremerhaben 14 un in Rodenborg (Wümm) sünd dat opstunns 16 Graad. Hüüt morgen is dat faken gries mit dichten Wulken. An´n Vörmiddag schient jümmer mehr de Sünn dör de Wulken. An´n Namiddag un Avend gifft dat en drögen Wessel ut Sünnschien un lockeren Wulken. De Wind weiht en beten bit in Maten, an de Waterkant böige Wind vun de Nordoosten Kant. Dat Thermometer wiest 21 bit 23 Graad. An de Küst 17 bit 20 Graad. In de Nacht sünd enkelte lockere Wulken an´n Heven. Mehrsttiets sünd de Sterns bi söven bit twölf Graad to sehn. Morn schient vun morgens bit avends de Sünn. Hier un dor sünd en poor opstiegen Wulken möglich. De Temperaturen liggen bi 20 bit 23 Graad. An de Küst 16 bit 19 Graad. Sünndag: En Wessel ut Wulken un Sünnschien. Hier un dor sünd en poor Drüppen vun baven möglich. 17 bit 22 Graad wiest den dat Thermometer.

Dat weern de Narichten op platt. Tohoopstellt hett Jörn Haarmann. Op Platt trechtmaakt un vörleest vun Markus Weise.

Bremen Eins Livestream & aktuelle Sendung.

Der Feiertag mit Katharina Guleikoff

Der Feiertag
Der Feiertag
  • Der Feiertag