Plattdeutsche Nachrichten Plattdüütsche Narichten vun'n 29. März 2023

Ampel finnt en Kurs bi Knackpunkte

Berlin: Dree Daag lang harr de Ampel-Koalitschoon tohoopseten. Nu hebbt se bi en Reeg Knackpunkte en Kurs fastleggt. So hebbt SPD, Gröne un FDP seggt: Allens, wat se för den Utbo vun Straten un Bahnen plaant, schall gauer lopen. Dat Geld dorför schall ok dorvun kamen, dat se vun tokamen Johr op an de LKW-Maut hoochsett. Anners as de Grönen dat eerst vörslaan harrn, köönt jümmers noch ne’e Ööl- un Gasheizungen inboot warrn – man de Staat will dor Vörgaven för maken. Heizungen, de al dor sünd, köönt wiederlopen.

Stimmen to dat, wat de Ampel fastleggt hett

Berlin: Umweltschützers hebbt dat bekriddelt, wat bi den Koalitschoons-Utschuss vun de Bunnsregerung rutsuert is. För de Düütsche Umwelthölp weren dat „Horror-Narichten ahn Enn“ – dor höört mit to, dat Autobahnen nu gauer utboot warrn schüllt. Dat süht de Hauptverband vun de Düütsche Bo-Industrie anners. De meen: Op Straten un Autobahnen löppt nu mal de meiste Verkehr, un dorum is dat richtig, de ok uttoboen. De Kinnerschutzbund weer dor nich mit inverstahn, dat de Regerung keen Weg funnen hett, woans de Grundsekerung för Kinner betahlt warrn schall.

Frankriek: Wedder Protest gegen Rentenreform

Paris: In Frankriek gaht vele Lüüd wedder gegen de Rentenreform op de Straat. Överall in’t Land hebbt Hunnertdusende demonstreert. In en Reeg Städte hett dat wedder Krawall geven, ok in Paris. De Polizei seggt: Se hebbt mehr as 200 Lüüd fastsett. De franzöösche Regerung will dat Öller för dat eerste Rentengeld hoochsetten – vun 62 op 64 Johr.

König Charles besöcht Düütschland

Berlin: De britsche König Charles III. un siene Fro kaamt vundaag op en Staatsbesöök na Düütschland. Dree Daag lang wüllt se blieven. Eerst sünd se an’n Brannenborger Door, later begrött Bunnspräsident Steinmeier jem in’t Slott Bellevue. Morgen schall Charles in den Düütschen Bunnsdag en Reed hollen. Dat geiht ok noch na Brannenborg, un an’t Enn besöcht de König an’n Freedag Hamborg.

Düütsche Football-Natschonalmannschap verleert Testspeel gegen Belgien

Köln: De düütsche Football-Natschonalmannschap hett güstern Avend ehr Testspeel gegen Belgien verloren. De Kru vun Bunnstrainer Flick is mit 2:3 na Huus schickt worrn. För Düütschland hebbt Gnabry drapen un Werder-Störmer Füllkrug. De hett in sien sösstet Lännerspeel sien sösstet Tor maakt.

Dat Weer

Un woans süht dat mit dat Weer umto ut? Opstunns hebbt wi in Bremen, Bremerhaven un Leer 6 Graad, in Weyerbarg sünd dat 7 Graad. Vundaag: Wulken, un de smiet ok mal en beten Regen daal. För en längeren Stoot kann dat aver ok dröög warrn un wat heller, ok de Süün waagt sik mal rut. Dat Thermometer krabbelt op 11 bet 14 Graad. De Wind dorto weiht flau oder en beten mehr vun de süüdwesten Kant, gegen Avend dreiht he op Süüd. Tokamen Nacht: Eerst dichte Wulken mit de een oder anner Regenfracht. Na Middernacht lockert dat vun Westen her en beten op, man schuern kann dat jümmers noch. Bi 10 bet 9 Graad, gegen Morgen wedder warmer. Morgen: Mal Sünnschien, mal Wulken. Över Dag treckt jümmers wedder Schuer dör, hier un dor ok mit Blitz un Dunnerslag. Dat Ganze bi 12 bet 16 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Michael Kück.