Plattdeutsche Nachrichten Plattdüütsche Narichten vun'n 23. März 2023

Bremer Mercedes-Wark verknappt Produktion

Bremen: De Daimler-Konzern mutt siene Produktion in sien Bremer-Wark, na Informationen vun buten un binnen, verknappen. Grund dorför is, as dat schient, dat man enkelte Dele för de Produktion nich nalevern kann. Vun April bit Juni könnt dorüm över 6.000 Autos minner as man egentlich plaant harr,  vun´t Band rollen. Ut den Grund will Mercedes ok de Tall vun de utlehnten Arbeiter trüch setten.

Besnacken över Verbranner-Autos geiht wieter

Berlin: Bunnsverkehrsminister Wissing rekent nich dormit, dat man sik flink enig is, in den Striet över dat Ut, för Autos mit Motors, de mit verbrannen arbeid. He verlangt in de  “Augsburger Allgemeenen” mehr Tiet för eene Diskussion. De Striet mag hütt ok Thema sien op dat EU-Fröhjohrs-Topdrepen in Brüssel.

Ne`e Streiks in Frankriek

Paris: In Frankriek hebbt de Gewarkschaften för hütt to´n 9. Mal to een Protestdag överall in´t Land opropen. Grund dorför is de Reform för Renten. As dat utsüht fallt hütt wedder vele Busse, Bahnen un Flöög ut. In´t ganze Land mutt man mit een op de Straat gahn vun Minschen un dicht maken vun Autobahnen un Brennstoff-Depots reken. Opletzt harr dat jümmers wedder Proteste mit Gewalt geven. De Reform för de Rente will, dat man erst mit 64 in Rente geiht, un nich as bit nu mit 62 Johren.

Brem`sche Börgerschaft will Gesetz gegen so nöömte „Schrott-Hüüs“ besluten

Bremen: Wenn een Vermieter siene Hüüs in Bremen un Bremerhaben verkomen lett, denn könnt Städte in de Tokunft eenen Treuhänder insetten, de de mallen Tostännen afstellt.So een Gesetz hett de Brem`sche Börgerschaft gistern Avend op den Weg bröcht. In Tokunft kann de Behöörd eene Dwangs-Verwaltung vun leere Hüüs or Hüüs, wo keen een Oog op hett, bestimmen.

Daalslag för de Pinguins

Bremerhaben: In de Runn vun de letzen 8 bi de Düütsche Eishockeymeisterschaft hebbt de Fishtown Pinguins in´t veerde Playoff-Speel, bi sik tohuus, gegen den EHC München mit 1:3 een op de Mütz kregen. Twischen de Pinguins un München kann dat noch wietere dree Spelen geven.

Dat Weer

Un nu een Blick op dat Weer: In Bremerhaven un in Cuxhaben 10, in Bremen un Achim sünd dat opstünns 12 Graad. Hütt hebbt wi vele Wulken an´t Heven un de Sünn kummt blots af un an mal dör. Dat gifft hier un dor Schuers, de ok mit Blitz u Dunnerslag mööglich sünd, bi 12 bit 15 Graad. Tokamen Nacht gifft das wedder ganz vele Wulken , de vun´t Emsland her Regen mit sik bringt, bi 10 bit 8 Graad. Morrn fröh geiht dat mit Schuers wieter. An´t Nomdag lockert dat op un de Regen treckt över de elbe af un de Sünn kummt mal dör. Af un an kann dat denn later wedder so´n beten pieseln.  De Temperaturen liggt bi 12 bit 15 Graad. Sünnavend wedder vele Wulken. De Sünn un de Wulken wesselt sik af, bi 10 bit 12 Graad. Dat weren de Narichten op Platt. Tohoopstellt hett se Ralph Stölting. Trechtmaakt un vörleest hett se vun Antje Kruppa.