Plattdeutsche Nachrichten Plattdüütsche Narichten vun'n 22. März 2023

Dusende Minschen demonstreren in Bremen wedder för mehr Geld in den Staatsdeenst

Bremen: In de Stadt demonstreren just wedder dusende Minschen för mehr Geld in den Staatsdeenst. Dorüm gifft dat hüüt Maleschen bi Kitas, Müllafhalen, öffentliche Verwalten un in kommunalen Krankenhüüs. De Gewarkschop Verdi will mit den Warnstreik den Druck na baven setten, tokamen Week geiht dat Verhanneln in de drütte Runn.

Börgerschaft seggt ja or ne to dat Klimapakeet

Bremen: De Börgerschaft stimmt just nu över dat Klimapakeet af. De Plaan dorbi is, en Nadrags-Huusholt för de tokamen Johren maken to könen mit dree Milliarden Euro nee´e Schulden. De root-gröön-roote Mehrheit will dat Geld in den klimaneutralen Ümbo för de Städer Bremen un Bremerhaben steken. CDU un FDP sünd in Groten un Ganzen för düsse Klimaplaans, man se bekriddeln aver, dat Vörhebben in´ne Hauptsaak över Kredite to betahlen.

Internatschonale Konferenz pröövt Versorgen mit Drinkwater op de ganzen Welt

Nee York: Bi de Vereenten Natschoon fangt hüüt de Welt-Waterkonferenz an. 6500 Fachlüüd ut de ganzen Welt snackt dorbi över de Versorgen mit Drinkwater. Dat Recht op Water un Hygieen-Versorgen is twars en amtlich Minschenrecht, liekers hebbt um un bi twee Milliarden Minschen keen Togang to reinen Drinkwater, see de UN. Rund teihn Perzent vun all Minschen op de Welt sünd dorna vun Watermangel bedrauht.

Sweedsch Parlament stimmen över Nato-Bitritt af

Stockholm: Dat sweedsche Parlament stimmt hüüt över den Nato-Bitritt vun ehren Land af. An´n Morgen hett al de Afslussdebatt anfungen, achterna will sik dat Parlament fastleggen. För den Bitritt to de Afwehrmaatschaft mööt eerst twee Gesetten ännert warrn. Man rekent dormit, dat de Mehrheit vun de Afordneten tostimmt, wat opletzt dorbi rutsuert, steiht woll laat an Namiddag fast.

Fachlüüd ünnersöken wat bi dat Füer in Osterholz-Tenever achter stickt

Bremen: Fachlüüd ünnersöken wat nip un nau achter dat Füer in en Hoochhuus in Osterholz-Tenever stickt. Dor hett in de Nacht en Köök in en Wanung in den 10. Stock Füer fungen. De Füerwehr kunnt just in rechten Ogenblick afwennen, dat en 39-Johrige Froo vun de Finsterbank afstöört. Se is dör dat Füer böös an Lief to schaden kamen. Ehre twee Kinner kunnen sik in dat Treppenhuus redden, se hebbt sik blots licht wat doon.

Dat Weer

Un nu kiekt wi op dat Weer: In Bremerhaben, Rottenborg un Cuxhaben hebbt wi 11 Grad un in Bremen sünd dat opstunns 12 Graad. Hüüt is dat meist stark wulkig. Övern Vörmiddag is ok mal en beten blau mang de Wulken, dat is aver gau vörbi. Eerst blifft dat dröög, an Namiddag regent dat vun de Nordsee un dat Emsland her. An Avend rieten de Wulken in dat Emsland op. De Wind weiht in Maaten bet frisch, an de Nordsee ok stark vun de süüdwesten Kant, mag ween, dat an de Küst ok mal störmsche Böen dorbi sünd. Dat Thermometer krabbelt op 11 bet 14 Graad. In de Nacht dicke Wulken, Steerns seht wi meist nich. Dorbi kann dat ok mal drüppel or dull pladdern, un dat bi 10 bet 8 Graad. Morgen mal dicke Wulken, aver ok mal blau mang de Wulken, meist hebbt aver de Wulken de Nees vörn. Mit dorbi sünd Regen, Blitz un Donnerslag un dat denn bi 12 bet 15 Graad.

Dat weren de Plattdüütschen Narichten. Tohoopstellt vun Carsten Putz. Op Platt trechtmaakt un vörleest vun Martina Brünjes.