Plattdeutsche Nachrichten Plattdüütsche Narichten vun'n 21. März 2023

Dokters streikt in verscheeden Bunnslännern

Hamburg: Veel Dokters vun kommunalen Krankenhüüs laat den ganzen Dag de Arbeit liggen. En Reeg plante Operatschoon wurrn afseggt, de Nootversorgen in de Krankenhüüs is aver seker stellt. Man ok in Neddersassen un Bremen maakt en grooten Barg Dokters bi den Warnstreik mit. In Bremen hebbt sik de Mediziners an Morgen vör dat Krankenhuus Bremen-Mitt drapen un löppt vun dor ut na´n Hauptbahnhoff. Se föhrt den na Hamburg, dor finnt en zentraale Versammeln statt. De Gewarkschop Marburger Bund verlangt för Dokters en Inflatschoonsutgliek vun 9 Perzent, man ok 2,5 Perzent mehr Lohn.

Rentenreform in Frankriek lööst wedder Protesten ut

Paris: Achterna de Rentenreform in Frankriek besluten wurr, ofwoll dor nich all mit inverstahn sünd, is dat in´ne Nacht wedder to bösen Krawallen kamen. Alleen in Paris sünd mehr as 170 Minschen achter Trallen kamen. De franzöösch Regeern hett güstern Avend twee Afstimmen över Misstroen överstahn. Dat Rentenöller in Frankriek schall stapp för stapp vun 62 op 64 na baven sett warrn.

Russlands Präsident Putin un Chinas Staatsbaas Xi snackt wieder

Moskau: Russlands Präsident Putin un Chinas Staatsbaas Xi maakt hüüt wieder mit ehren Drepen in Moskau. Güstern gung dat Snacken los, dorbi hebbt de Twee ünner veer Ogen snackt, man ok över den Krieg in de Ukraine. Hüüt schall dat dorüm gahn, wo all beid Sieten in Tokunft ehre Wirtschaft tohoop utboen köönt.

Vöss in Neddersassen mit Vagelgrippvirus infizeert

Hannober: To´n eersten mal is bi Vöss in Düütschland dat böösanstickend Vagelgrippvirus nawiesen wurrn. Dat maakt dat neddersässche Landwertschopsministerium künnig. All tohoop is bi veer Derten dat Virus faststellt wurrn, man ok in den Landkreis Veern.

Staatliche Impfsteeden in Bremerhaben maaken dicht

Bremerhaben: In Bremerhaben warrt hüüt to´n letzten Mal in staatlichen Impfsteeden gegen dat Corona-Virus impft. Laat an Namiddag maakt de Impfsteed in dat Hanse-Carré dicht. Man ok de Impfbussen sünd hüüt to´n letzten mal ünnerwegens. Vun morgen af an geven blots noch Dokters in egen Praxen de Sprütt gegen dat Corona-Virus. In Bremen hebbt all staatlich Inrichten för de Impfaktschoon verleden Freedag dicht maakt.

Dat Weer

Un nu kiekt wi op dat Weer: In Bremen, Bremerhaben, Möppen un Emm hebbt wi överall 9 Graad. Hüüt blifft de Heven vull Wulken un de Sünn schafft dat meist nich. An Vörmiddag dröppelt dat eerst en beten, övern Dag vun dat Emsland un de Nordsee her denn mehr. An Avend warrt dat tominns in Ostfreesland länger mal dröög un hier un dor is ok blau mang de Wulken to sehn. De Wind weiht flau bet in Maaten, an Namiddag op de Eilannen ok frisch mit starken Böen vun de südwesten Kant. Dat Thermometer krabbelt op 11 bet 13 Graad. In de Nacht meist wulkig, af un an funkeln ok de Steerns. Meist blifft dat dröög, hier un dor enkelte Regenschuer un dat denn bi 9 bet 7 Graad. Middeweken wedder dicke Wulken, an Vörmiddag sünd dor ok mal en paar free´e Steeden twuschen, de denn aver gau wedder opfüllt warrn. Eerst blifft dat dröög, an Namiddag regent dat vun de Nordsee un dat Emsland wedder mehr. An Avend rieten de Wulken en beten op un dat denn bi 11 bet 13 Graad.

Dat weren de Plattdüütschen Narichten. Tohoopstellt vun Katrin Martens. Op Platt trechtmaakt un vörleest vun Martina Brünjes.