Plattdeutsche Nachrichten Plattdüütsche Narichten vun'n 20. März 2023

Chines’scher Staatsbaas reist na Russland

Moskau: Chinas Staats- un Parteibaas Xi Jinping reist hüüt to en Staatsbesöök över dree Daag na Russland. För den Anfang is en informell Drapen mit Präsident Putin plaant. Morgen schüllt de Delegatschonen denn offiziell mitnanner verhanneln. Beide Sieden wüllt ünner annern ehr Tosamenarbeit in Hannel un Butenpolitik utboen. Xi hett sik vörweg to dat russ’sch-chines’sche Verhältnis bekennt. To glieke Tiet hett he en Friedenslösung in’n Ukraine-Striet verlangt.  

Swiezer Bank UBS övernimmt wackelige Credit Suisse

Zürich: De wackelige Swiezer Bank Credit Suisse is rett worrn. Se ward vun de Swiezer Bank UBS övernahmen. De Swiezer Natschonaalbank gifft de beiden Banken Stöhn mit en Darlehen vun je 100 Milliarden Franken, wat ümrekent 101 Milliarde Euro sünd. Dat Övernehmen vun de Credit Suisse dör de UBS is de bedüdenste Bankenfusion in Europa siet den Finanz-Slamassel vör 15 Johr. Mit dütt Afkamen ward de UBS to en Mammutinstitut, dat grötter ward as de Düütsche Bank.

Krisendrapen vun Krabbenfischers in Dorum

Cuxhaben: In Dorum bi Cuxhaben wüllt de Krabbenfischers an’n Vörmiddag to en Krisendrapen mit den EU-Parlamentsafordneten McAllister tosamenkamen. De Krabbenfischers bangt üm ehr Överleven. Dat liggt doran, datt de EU-Kommischoon dat Insetten vun Grund-Slepnetten in Meeresschutzflachen verbeden will. Dat is as en Berufsverbott, as de Fischers seggt, denn de Krabben laat sik blots an’n Grund vun’t Meer fangen.    

Metzensteker na mörderischen Striet wieterhen op de Flucht

Münster: Na den mörderischen Striet op en Volksfest in Münster is de, de dat daan hett, wieterhen op de Flucht. Twee Mannslüüd hebbt an’n Sünnavend an en Karussell en Striet anfungen. De unbekannte Verbreker hett denn mit en Metz den annern daalstaken. De 31-Johrige is noch an desülvige Steed doodbleven. Wo dat to düssen Striet kamen is, is betto noch nicht klaar. 

Mudder versehrt Dochter swor bi’t Inparken

Bad Bederkesa: In Bad Bederkesa hett güstern en Autofohrersch ehr Dochter bi’t Inparken swor versehrt. As de Polizei vermellt, hett dat Auto opmal trüchsett un dorbi de Dochter an de Huuswand inklemmt. De 36-Johrige is swor versehrt in’t Krankenhuus bröcht worrn. Middewiel mutt se woll aver nich mehr üm ehr Leven bangen.

Dat Weer

Un nu en Blick op dat Weer: In Nordholt 7, in Bremen, Bremerhaben, Cuxhaben un Emmen 8, un in Nienborg un Deefholt sünd dat opstünns 9 Graad. Hüüt is dat meisttiets wulkendüüster, un de Sünn is meist gor nich to sehn. Twüschen Werser un Elv fallt eerst ok lichter Spütterregen. Vun Middag an gifft dat vun de Ems her fakener Regen. De Temperaturen liggt bi 9 bet 11 Graad. In de Nacht treckt de Regen na de Lünborger Heid hen un över de Aller af. De Wulken lockert aver meist gor nich op, un later kaamt noch enkelte Regenschuers na bi 8 bet 6 Graad. Ok morgen blifft dat hevenschattig, un de Sünn wiest sik wedder wenig bet gor nich. Dorbi fallt al an’n Morgen hier un dor’n beten Regen, de vun’t Emsland un de Noordsee her mehr ward un sik an’n Vörmiddag na Oosten hen utbreedt. An’n Namiddag regent dat för en längere Tiet, ehrdat dat an’n Avend tominnst in Oostfreesland ok af un an wedder dröög blifft. Dat Thermometer stiggt op 11 bet 13 Graad.

Dat weern de Narichten op platt. Tohoopstellt hett se Katrin Martens. Op Platt trechtmaakt un vörleest vun Marc Gelhart.