Plattdeutsche Nachrichten Plattdüütsche Narichten vun'n 17. März 2023

Reform vun dat Wahlrecht in'n Bunnsdag

Berlin: De Bunnsdag stimmt jüst af över dat, wat de Ampel-Parteien as Wahlrechtsreform plaant. Wo se op daal wüllt: In’t Parlament schüllt weniger Lüüd rinkamen. Na de neechste Bunnsdagswahl schall dat nich mehr as 630 Afgeordnete geven, dat sünd sowat hunnert weniger as nu. SPD, Gröne un FDP wüllt: Dat schall kene Överhang- un Utglieksmandaten mehr geven.

De ne’e Generaalsinspektöör vun de Bunnswehr nimmt sien Amt op

Berlin: De ne’e Generaalinspektöör vun de Bunnswehr, Breuer, nimmt vundaag sien Amt op. Bunnsverteidigungsminister Pistorius begrött den Mann vun 58 Johr vunnamiddag in den Bendlerblock mit militäärsche Ehren. Breuer harr bet nu dat Leit vun en Föhrungskommando un vörher weer he de Baas vun de Corona-Krisengrupp in’t Kanzleramt ween.

Warnstreiks: Flegers köönt nich los

Düsseldörp: Warnstreiks an veer düütsche Flegerhavens sorgt dorför, dat vele Maschinen an’n Grund blievt. Lüüd, de vun Düsseldörp, Köln, Stuttgart un Karlsruh/Baden Baden losflegen wüllt, mööt sik dor op instellen, dat nich allens rund löppt. De Flegerhavenverband seggt: Sowat 680 Flegers köönt nich los. De Gewarkschap verdi will so Druck maken. Wo se över de Tarife för den öffentlichen Deenst verhannelt, geith dat ok um dat Geld för den Sekerheitsdeenst.

Wahlleitung leggt fast: Kann de AfD bi de Bremen-Wahl mitmaken

Bremen: De Wahlleitung leggt hüüt Vörmiddag fast, wat de AfD bi de Börgerschapswahl in’n Mai mitmaken dröff oder nich. In Bremen un Bremerhaven sitt jüst de Utschüsse vun de Wahlquarteren tohoop. Se entscheed över de Wahlvörslääg vun all de Parteien. Bi de AfD sünd se sik nich gröön, un in Bremen hebbt se twee Wahllisten vörleggt. Na dat Parteiengesetz is dat nich rechtens.

Bremer Kinnerambulanz maakt dicht

Bremen: Knapp teihn Weken weer se in Gang, vundaag nu maakt de Kinnerambulanz in de Bremer Binnenstadt dicht. Dat Gesundheitsressort harr ehr inricht, se wullen de Last vun de Kinnerdokters in’t Land nehmen. Ünner’n Streek is dat goot lopen. 2.500 Öllern harrn an’t Telefon Raatslääg kregen, un 2.000 Kinner weren in de Kinnerambulanz bedoktert worrn.

Dat Weer

Un woans süht dat mit dat Weer umto ut? Opstunns hebbt wi in Bremen un Bremerhaven 8 Graad, in Weyerbarg sünd dat 9 un in Frieseythe 10 Graad. Vundaag treckt allerhand Wulken dör. Man de Sünn will sik ok wiesen. Meisttiets is dat dröög, eerst an’n Namiddag un Avend kann dat en beten pieseln. Dat Thermometer krabbelt op 12 bet 17 Graad. De Wind dorto weiht flau oder en beten mehr vun de süden Kant. Tokamen Nacht: Dichte Wulken treckt dör, un de smiet ok en beten Natts daal. Vun’t Emsland her lockert dat ok mal op. Bi 9 bet 6 Graad. Morgen: Mehr Wulken as Sünnschien. An’n Vörmiddag kummt vun’t Ossenbrügger Land Regen na Bremen un den Noordwesten rin. An‘n Namiddag pliert ok de Sünn mal rut. Man dat kann ok pladdern, mag ween ok mit Blitz un Dunnerslag. Dat Ganze bi 11 bet 17 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Irene Lottes.