Plattdeutsche Nachrichten Plattdüütsche Narichten vun'n 16. März 2023

Länner wüllt mehr Geld vun’n Bund för dat Versorgen vun Flüchtlingen

Berlin: De Regerungsböversten vun de Bunnslänner snackt opstünns bi en Drapen över de Utgaven för dat Ünnerbringen un Versorgen vun Flüchtlingen. Bremen un Neddersassen wüllt vun’n Bund, datt he mehr Geld gifft. Länner un Gemeenden kaamt woll an de Grenz vun ehr wirtschaftliche Last, säe Bremens Börgermeister Bovenschulte. Neddersassens Ministerpräsident Weil will, datt de Kosten gerecht twüschen Bund un Länner opdeelt ward. Mit Bunnskanzler Scholz snackt de Landsböversten eerst in’n Mai.

Bunnsdag schall dat Finanzeern vun 49-Euro-Billjet afnicken

Berlin: De Bunnsdag schall an’n Middag dat Finanzeern vun dat 49-Euro-Billjet för Bussen un Bahnen afnicken. Bund un Länner hebbt lang doröver streden, wokeen de Kosten dragen schall. Nu ward de Bund vun 2023 bet 2025 je 1,5 Milliarden Euro praatstellen, üm bi de Verkehrsverbännen dat Halve, wat an Innahmen utfallt, uttoglieken. De anner Hälfte schüllt de Länner betahlen. Dat Gesetz mutt ok de Bunnsraat afnicken. Dat so nöömte Düütschlandbilljet för den bunnswieten Verkehr vun dichtbi för 49 Euro in’n Maand schall dat vun’n 1. Mai an geven.   

Swiezer Grootbank will sik 50 Milliarden Euro utlehnen

Zürich: De Swiezer Grootbank Credit Suisse, de opstünns in de Bredulje is, will sik mehr as 50 Milliarden Euro bi de Zentraalbank vun’t Land utlehnen. Credit Suisse hett toletzt düchtig in de Kniep seten, un de Aktien vun de Bank sünd güstern twüschendör üm mehr as 30 Perzent afstött. Dat liggt doran, datt de Natschonaalbank ut Saudi-Arabien, de de gröttsten Andele hett, verklaart hett, datt se dat klamme Swiezer Institut keen Geld mehr praat stellen wüllt. De düütsche Finanzminister Lindner hett middewiel versekert, datt dat düütsche Finanzsystem wieterhen stabil is.    

Warnstreiks in’n Staatsdeenst in Bremerhaben

Bremerhaben: De Warnstreiks in’n Staatsdeenst gaht hüüt ok in Bremerhaben wieter. Mehrere Kitas beedt blots en Nootfalldeenst an. Ok de Börgerbüros, de Föhrerschiensteed un de Migratschoonsbehöörd schüllt de Arbeit liggen laten. För tokamen Middeweken hett de Gewarkschaft to landswiete Warnstreiks in Bremen un Neddersassen opropen.     

Ieshockey-Team ut Bremerhaben winnt gegen Favorit

Bremerhaben: De Fischtown Pinguins hebbt dat eerste Speel ünner de letzten acht bi de Düütschen Ieshockey-Meisterschaft wunnen. De Bremerhabener hebbt sik unvermodens bi den Favoriten EHC München mit 3:1 dörsett. Dat twete Speel vun de Serie ward morgen in Bremerhaben lopen. Um wietertokamen, mööt de Pinguins all tohoop veer Mal winnen.

Dat Weer

Un nu en Blick op dat Weer: In Bremerhaben, Cuxhaben un Dörveern 3, un in Bremen, Emmen un Leer sünd dat opstünns 4 Graad. Hüüt geiht dat mit veele Wulken, aver dröög in den Dag. Besünners Oosten de Werser kann dat dör dünne Wulken eerst af un an noch Sünnschien geven. Vun Middag an fallt ut dichte Wulken eerst vun de Noordseeküst bet to dat Emsland Regen. An’n Namiddag kann dat ok in Bremen un ümto Regen geven. Vun de Ems her ward de Regen denn wedder weniger. Dat Thermometer kladdert op 7 bet 9 Graad. In de Nacht blifft dat dröög bi mehrstendeels dichte Wulken. Af un an kann dat in’n Süden vun’t Bremer Flach un to dat Emsland hen oplockern bi 5 bet 3 Graad. Morgen kann dat süüdlich vun Bremen Sünnschien dör dünne Wulken geven, wieldess de Wulken an de Küst meisttiets dicht sünd. An’n Namiddag treckt vun de Nedderlannen her dichte Wulken op, de ok Schuer bringt. Dat ward lau bi 12 bet 18 Graad.

Dat weern de Narichten op platt. Tohoopstellt hett se Sven Weingärtner. Op Platt trechtmaakt un vörleest vun Marc Gelhart.