Plattdeutsche Nachrichten Plattdüütsche Narichten vun'n 15. Januar 2023

Laag twüschen USA un Russland ward kribbeliger

Washington – Dat Afstörten över dat Swatte Meer vun een amerikansche Drohn to’n Opklaren hett de Laag twüschen de USA un Moskau nochmal kribbeliger maakt. De US-Regeern seggt, Russland weer Schuld an dat Afstörten un bestellt den russischen Botschafter in Washington in. Moskau seggt, se harrn mit dat Afstörten nix to daan. De Drohn weer nich beschaten or op annere Oort angrepen worrn, vermellt dat Ministerium för Verdeffenderen in Russland.

Noch mehr Wapen för de Ukraine ankamen

Bremerhaben – An’n Morrn hett noch een US-Schipp mit Panzern in’n Kaiserhaben anleggt. De Wapen sünd för de Ukraine un Deel vun’n US-Hölpspaket. Se rekent woll in de tokamen Maand darmit, dat tohoopnahmen rund 150 socke Scheep in Bremerhaben ankummt, heet dat ut Habenkreisen – man seker is dat nich. Bunneswehr un US-Armee wüllt nix to de Transporte seggen. Een erste Leverung is Midde Februar in Bremerhaben ankamen.

Boo vun nee’et Strmfloot-Sparrwark duert noch

Bremerhaben – De Boo vun dat nee’e Stormfloot-Sparrwark duert noch een paar Johre. Fröhestens 2033 ward dat fardig, vermellt de Habengesellschupp. Dürer ward dat Sparrwark ok. Statt 33 Millionen Euro ward de Bookosten woll bi wiet över 100 Millionen Euro liggen. Dat ole Geest-Sparrwark gellt as swacke Stee bi Stormfloten. De Doren reckt nich för noch högere Waterstänne.

Solardacks schüllt op Neeboos Plicht weern

Bremen – Op Neeboos schüllt in Bremen bold Solardacks Plicht weern. Een Plaan för een Gesett darför ward an’n Namiddag in de Deputatschon för Ümwelt un Klima diskereert. Vun 2025 an mööt Booherren denn tominnst de Hälft vun ehr Dack mit Photovoltaikanlaags bestücken, so steiht dat in den Plaan. Wokeen sien Huusdack op Schick bringt, schall all vun‘n nöchsten Sommer an to een Solardack verplicht weern.

Streiks to’n Wohrschaun in’n Staatsdeenst gaht wieter

Hannober – De Streiks to’n Wohrschaun in’n Staatsdeenst in Neddersassen gaht vundaag wieter. Blangen Kinnergarn un den Verkehr vun dichtbi sünd in een paar Städten ok wieter Krankenhüüs bedrapen. Streik gifft dat ünnern in Ollenborg. Bi de Bremer Brueree Beck & Co ward hüüt ok lawayt. De Arbeiters leggt bit hüüt Abend de Arbeit nedder, wiel se mehr Geld foddert un Drock maken wüllt.

Dat Weer

Un nu een Blick op dat Weer: in Bremerhaven 3, op Wangerooge un in Deefholt 4 un in Bremen sünd dat opstunns 5 Graad. Vundaag gifft dat Sünn un ok mal Wulken, köönt ok mal Regen-, Snee- un Grisselgrusselschuers darbi ween – bi 6 bit 8 Graad. Tokamen Nacht laat de Schuers na un in de Nacht funkeln faken de Sterns. An’n Morrn treckt Wulken vun de Nedderlannen her op, dat blifft aver dröög. Dat Thermometer sackt op plus 2 Graad op de Eilanden bit minus 2 Graad in’t Binnenland. Morrn geiht de Dag mit velen Wulken, man dröög los. Vör allens in’n Osten vun de Werser kann de Sünn ok mal rutkieken. An’n Namiddag un Avend fallt bi griesen Heben vör allens vun de Nordseeküst bit in’t Emsland Regen, anners blifft dat aver meist dröög – bi 7 bit 9 Graad. Dat weern de Narichten op Platt. Sven Weingärtner hett se tohoopstellt. Op platt trechtmaakt un vörleest hett se Heidi Jürgens.