Plattdeutsche Nachrichten Plattdüütsche Narichten vun'n 14. März 2023

Bovenschulte hofft noch för Karstadt

Bremen: Bi Karstadt in de Obernstraten maakt se de Dören vundaag later op – vunwegen en Bedrievsversammeln. De Koophuuskunzern Galeria Karstadt Kaufhof harr güstern anseggt: In ganz Düütschland warrt se 52 Hüüs dichtmaken. Dor mit bi sünd ok de in Bremen un Ollenborg, ok wenn seggt warrt: Beid verdeent se jümehr Geld. He hett noch nich opgeven, sä Börgermester Bovenschulte op bremen een. Karstadt weer en Deel vun Bremen. Jüst as Wirtschapssenatorin Vogt warrt Bovenschulte bi de Bedrievsversammeln mit bi ween.

Warnstreiks bi de Gesundheitsdeensten

Ollenborg: In den Tarifstriet vun den öffentlichen Deenst hett de Gewarkschap verdi för vundaag opropen to Warnstreiks bi de Gesundheitsdeensten. Mitarbeiders in Kranken- un Pleeghüüs un bi Reddungsdeensten schüllt jümehr Arbeit liggen laten. Vun den Warnstreik kriggt ok dat Klinikum Ollenborg wat af. Patschenten mööt wat länger töven, man dat gifft en Nootdeenst. Ok in Oostfreesland staht in de Kliniken Auerk, Emm un Nörden Warnstreiks an. In Bremen un Bremerhaven plaant se dütmal kene Akschonen.

Wehrbeopdragte leggt Bericht vör

Berlin: De Wehrbeopdragte vun den Bunnsdag, Högl, leggt vundaag ehren Johrsbericht över den Tostand vun de Bunnswehr vör. Vörher weer al bekannt worrn, Högl meent: Bi de Utrüstung vun de Bunnswehr fehlt dat jümmers noch an all Ecken un Ennen. Ok verlangt se, an de Anlagen un Kasernen müss veel mehr maakt warrn. To de 10 Milliarden Euro, de Verteidigungsminister Pistorius för de Bunnswehr mehr verlangt hett, meen de Wehrbeopdragte: Dat is woll de richtige Kurs.

Top-Drapen för Bildung

Berlin: Bunnsbildungsministersch Stark-Watzinger hett för vundaag inlaadt to en Bildungs-Top-Drapen. Lüüd vun den Bund, de Länner, Gemeenden un de Wetenschaft wüllt över dat snacken, wat an de düütschen Scholen nich rund löppt. Dat geiht dorum, dat Schoolmesters fehlt, to vele Schölers de School nich to Enn bringt un dat de Scholen digital nich goot opstellt sünd. Stark-Watzinger hett opropen: Wo de Sorgen so groot sünd, schullen all een Kurs stüern. De Bildungsministers vun de CDU sünd dor nich mit bi. Se meent, dat Drapen weer nix as en PR-Akschoon.

Schilling will mehr Toll in de Havens

Bremerhaven: Havensenatersch Schilling verlangt: De Toll schull sik mehr wiesen in de Bremschen Havens. Se is bang, in Bremerhaven kunnen sik Verbreker-Koppels fastsetten, so as in Rotterdam oder Amsterdam. Ok in Bremerhaven harrn se in de verleden Johren jümmers wedder en Barg Kokain ut Süüdamerika funnen. Un denn weren de Smugglers bannig driest worrn, wohrschau de Havensenatersch. Dat weer nich blots en Gefohr för de Havens un de Wirtschap dor, man ok för de Minschen.

Dat Weer

Un woans süht dat mit dat Weer umto ut? Opstunns hebbt wi in Bremerhaven 8 Graad, in Deefholt sünd dat 10 un in Bremen un Achem 11 Graad. Vundaag: Eerst gries, un dat regent ok veel. An’n Namiddag lockert de Wulken op, denn warrt dat ok dröög. An’n Avend treckt denn aver vun de Noordsee her wedder Schuer ran, de ok as Snee oder Grisselgrussel vun baven kaamt. Blitzen un dunnern kann dat ok noch. Dat Thermometer stünn vunmorgen bi 8 bet 11 Graad. Nu warrt dat köhliger, un an’n Namiddag sünd dat blots noch 4 bet 7 Graad. De Wind dorto weiht in Maten bet frisch, an de See ok deegt, un he dreiht vun de süüdwesten na de noordwesten Kant. Tokamen Nacht: Mal mehr, mal weniger Wulken. In’t Binnenland treckt en poor, an de See aver ok mehr Schuer dör. Bi 3 Graad över 0 bet 1 Graad unner 0. Morgen: An de See un twüschen Werser un Elv de een oder anner Schuer mit Regen, Snee un Grisselgrussel. Na’t Emsland to kriegt wi de Sünn mehr to sehn. Dat Ganze bi 6 bet 8 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Birgit Sagemann.