Plattdeutsche Nachrichten Plattdüütsche Narichten vun'n 13. März 2023

Lawei för Wohrschau an Flegerhavens

Bremen: An´t Bremer Flegerhaven fallt hütt all Starts un Landungen ut. Grund dorför is een Lawei för Wohrschau. Dorto hett de Gewarkschaft Verdi, vunwegen de vigeliensche Situation bi dat Verhanneln över de Tarife in´t Staatsdeenst, opropen. Ok in Hannover, Hamborg un Berlin gifft dat hütt keenen normalen Floogbedrief. Na Angaven vun´t Flegerhavenverband ADV fallt mehr as 350 Flöög ut. 45.000 Passagere sünd dorfun direkt bedropen.

Esken verlangt Extra-Geldputt för Bilden

Berlin: Vör dat so nömten Top-Drepen för Bilden, wat morrn is, hett SPD-Böverste Esken för Bilden eenen Extra-Geldputt vun 100 Milliarden Euro verlangt. Dat is vun meist de sülvige Höchte, as wie för de Bunnswehr. Esken seggt to de „Rheinische Post“, dat Bund, Länner un Kommunen dorvun Hüüs wedder op Schick bringt, för Digitalisierung sorgt un ok de Rechtsanspruch op eenen Platz för´t Kinner-Oppassen finanzeert. Dat is een Duer-Upgaave, dat all Kinner de glieken Start-Chancen hebbt un bekoomt.Ok Linken-Böverste Wissler verlangt so eenen Extra-Geldputt.

Drepen vun den Opsichtsraat bi Galeria Karstadt Koophuus

Essen: Bi den Konzern Galeria Karstadt Koophuus, de in de Kniep is, besnackt sik hütt de Opsichtsraat. De snackt doröver, welke Filialen he dicht maakt un wovele Mitarbeiders ehren Job verleert. Dat Management hett all eenen düütlichen Kahlslag ankünnigt. Vele vun de insgesamt 129 Hüüs willt se dicht maken.

Veer Oscars för düütschen Film

Los Angeles: De düütsche Anti-Kriegs-Film „In´t Westen nix Neeis“ hett bi dat Vergeven vun de Oscars afrüümt. He hett insgesamt veer Stück kregen, ok as beste internationale Film. Noch mehr Oscars hett de Science-Fiction-Film „Everything Everywhere All at Once“ afrüümt. He hett ok in de Kategorie „Beste Film“ und „Beste Regie“ wunnen. De Oscars för de besten Haupt-Schauspeler hebbt Michelle Yeoh un Brendan Fraser kregen.

Fachlüüd besnackt sik över Water-Knappheid

Bremerhaven: In´t Klimahuus Bremerhaven kummt hütt un morrn Wetenschaftler un Fachlüüd, de vör Katastroofen schützt, tosamen. Se besnackt sik över den Klimawannel, un wat dordör achterna kummt. An de 80 Experten ut Düütschland un de Nedderlannen sünd mit vun de Partie. Se snackt doröver, wo sik Städte, Gemeenden, Ünnernehmen un Minschen in Düütschland op de kamen Dröögde un den Mangel an Water instellen künnt. De Veranstalten is nich blots för de Fachlüüd, ok keen an dat Thema interessert is kann mit dorbi wesen.

Dat Weer

Un nu een Blick op dat Weer: In Bremerhaven 9, in Bremen 10, un Defhold un Leer sünd dat opstünns 11 Graad. Hütt Vomdag hebbt blifft dat natt, mit vele dichte Wulken an´t Heven. An´t Nomdag lockert de Wulken mal op un dat hört ok mal op to pieseln, bi 11 bit 15 Graad. Tokamen Nacht lockert de Wulken ok wedder op, un dat blifft meist dröge. To´n Morrn hen fallt vun de Nordsee her hier un dor Regen, bi 9 bit 7 Graad. Morrn Vomdag is de Heven erst bedeckt un dat regnet. Later is dat wesselhaft un wi mööt mit Schuers mit Snee or Grisselgrussel reken. Ok Blitz un Dunnerslag sünd mööglich. De Temperaturen liggt bi 8 bit 11 Graad. Middeweeken gifft dat wedder eenen Mix ut Sünn un Wulken, un Schuers,de Regen, Snee un Grisselgrussel mit sik bringt, bi 6 bit 8 Graad. Dat weren de Narichten op Platt. Tohoopstellt hett se Birgit Sagemann. Trechtmaakt un vörleest hett se Antje Kruppa.