Plattdeutsche Nachrichten Plattdüütsche Narichten vun'n 10. März 2023

Dode na mööglichen Amokloop in Hamborg

Hamborg. In Hamborg schall na den womööglichen Amokloop ok de Verbreker ünner den Doden ween. Dat hett de Polizei vermellt. De Schütt harr an´n Avend in dat Huus vun de Tügen Jehovas tominnst acht Minschen dootschoten. Acht Minschen hebbt wat afkregen. An´n Middag schall op en Pressekonferez över den Stand vun de Ünnersöken informeert weern.

Chineesch Staatsbaas wedder wählt

Peking. De chineesch Volkskongress hett Staats- un Parteibas Xi Jingping för en drütte Amtstiet wählt. As dat to vermoden weer, stimmten de binah dreedusend Afornten eenstimmig för noch en Amtstiet vun fief Johren. De 69 Johr old Staats- un Parteibaas sülfst hett de betto gullen Öllers- un Amtstietregeln 2018 trüchnahmen.

CDU in Bremen hett Programm för Börgerschaftswahl fastleggt

Bremen. De CDU in Bremen hett an´n Avend ehr Programm för de Börgerschaftswahl fastleggt. Ohn Gegenstimm un ohn gor keen Menen stimmten 150 Liddmaten bi den Parteidag dorför. Dat Thema Bildung stellt de Partei in ehr 120 Sieden Papeer ganz na baven.

De Winter is kamen un sorgt för vele lütte Unfallen

Bremen. De Winter is kamen un hett in Bremen för en poor Unfallen sorgt. Na Angaven vun de Polizei geev dat dorbi kien Versehrten. Meist hebben blots de Autos wat afkregen. De Polizei Ollenborg vermellt mehr as 20 Unfallen, dorbi sünd en poor Minschen en beten to Schaden kamen. Op de Autobahnen sorgten en poor Unfallen för Staus.

Football Natschonalmannschaft speelt in´t Weserstadion

Bremen. In´t Weserstadion warrt dat in´n Sommer en Lännerspeel vun de düütsche Football Natschonalmannschaft geven. Wedderpart is na Informatschonen vun de Sportschau de Ukraine. Betto snackt se över den twölften Juni as Termin. Vundag will de DFB den Termin amtlich bekannt maken. De Natschonalmannschaft harr toletzt in´n Februar 2012 in´t Weserstadion speelt. Dorna hebbt se Bremen an de Kant schuven.

Dat Weer

Un nu noch en Blick op dat Weer: in Deefholt een, in’n Bremen-Mitt null un in Bremerhaben un in Hooksiel sünd dat opstunns een Graad. Hüütsünd vele Wulken an´n Heven un dat koomt natt vun baven. In´n Norden fallt hier un dor länger Snee. Dat kann glatt ween.Bit to´n Avend geiht de Regen vun´t Emsland her ok in´t Binnenland na un na wedder in Snee över. De Wind weiht en beten bit in Maten. Op de Eilannen frische Wind vun de Nordoosten Kant. De Temperaturen liggen bi een bit dree Graad. In de Nacht treckt de Snee- un Sneeregen af un vun de Küst lockern de Wulken mehr un mehr op. Meist överall kann dat glatt ween. Dat Thermometer wiest minus veer bit null Graad. Morn gifft dat en Wessel ut Wulken un Sünnschien mit af un an Regen- or Sneeregenschuern. Dorbi stahn denn veer bit söss Graad op dat Thermometer. Sünndag: Vele Wulken, wenig Sünnschien un af un an Regen- or Sneeregen bi fief bit söven Graad. Dat weern de Narichten op platt. Tohoopstellt hett Katrin Martens. Op Platt trechtmaakt un vörleest vun Markus Weise.