Plattdeutsche Nachrichten Plattdüütsche Narichten vun'n 9. März 2023

Atomkraftwark Saporischschja gifft wedder keen Stroom af

Kiew: In de Ukraine is dat Atomkraftwark Saporischschja wedder vun den Stroom afsneden. De Bedriever seggt: Dat russsche Militär harr dat Kraftwark wedder dull angrepen, un dorum löppt dor nu de Nootbedriev. De ukrainsche Regerung vermellt al den ganzen Morgen, dat överall in’t Land Raketen daal kaamt. Dat geiht vör allen gegen Inrichtungen för de Versorgung, un dor höört ok Kraftwarken mit to.

Lauterbach stellt Plaan för digitalen Medizindeenst vör

Berlin: Gesundheitsminister Lauterbach leggt jüst sien Plaan för den digitalen Medizindeenst vör. Bavenan steiht de elektroonsche Patschentenkoort. Vun’t Enn tokamen Johr op an schall de normal ween. Denn is jeedeen dor mit bi, de sik nich dorgegen verwohrt hett, meen de SPD-Mann. Patschenten- un Datenschützers sünd dor nich mit inverstahn. De gesetzlichen Kranken- un Pleegkassen dorgegen steilt Lauterbach den Rüch.

CDU un SPD in Berlin verhannelt över Koalitschoon

Berlin: CDU un SPD hebbt just anfungen, över en Lannsregerung to verhanneln. Dat is dree Weken her, dat dor noch mal wählt warrn müss. Nu sitt Politikers ut beide Parteien in 13 Arbeitskoppels tohoop. Dor geiht dat um Wahnungsbo, Verkehr, Klimaschutz oder de Sekerheit na binnen. De swatt-rote Koalitschoons-Kuntrakt schall bet Anfang April trecht ween.

Bremer Wahlleitung kickt sik an, wat de AfD bi de Börgerschapswahl opstellt warrn kann

Bremen: De Wahlleitung kickt sik jüst nipp un nau an, wat de AfD in’n Mai bi de Börgerschapswahl mitmaken kann oder nich. Wat dor achter stickt: Dat gifft twee Kandidaten-Listen. Een dorvun hett de Lannsvörstand vörleggt, de twete is vun en Nootvörstand, de sik sülvst insett hett. Man ok wenn dat in de Bremer AfD Larm un Arger gifft, dröfft se blots mit een Kandidaten-List mitmaken. Mag ween un de Striet sorgt dorför, dat de Partei heel un deel vun de Wahl streken warrt.

Bremen: Lanns-Rekenhoff leggt Johrsbericht vör

Bremen: De Lanns-Rekenhoff leggt jüst sien Johrsbericht vör. Verleden Johr al harr de Behöörd en Reeg Fehler faststellt un dat bi dat staatliche Fördergeld nich allens na Recht un Gesetz lopen is. De Bremer Verwaltung harr denn Bescheed kregen, se schull noch mehr dor op achten, dat dat Geld na de Regeln verdeelt un utgeven warrt.

Dat Weer

Un woans süht dat mit dat Weer umto ut? Opstunns hebbt wi in Bremen, Bremerhaven un Cuxhaven 1 Graad, in Leer sünd dat 2 Graad. Vundaag: An de Küst meisttiets dröög mit en beten Sünnschien. Annerwegens blievt de dichten Wulken stahn. De Snee treckt na Oosten över de Lümborger Heid af. Bet to’n Avend kummt denn vun Westen her en beten Regen, Sneeregen oder Snee op. Dat Thermometer krabbelt op 3 bet 5 Graad. De Wind dorto weiht flau vun de oosten Kant. Tokamen Nacht: An de See blifft dat dröög, anners fallt faken Snee, Sneeregen oder Regen. Dat kann ok glatt warrn. Koolt warrt dat 1 Graad över 0 bet 1 Graad unner 0. Morgen: Dichte Wulken, un de smiet en düchtige Last af, in’n Noorden ok as Snee, un denn kann dat glatt warrn. Bi 2 bet 5 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Carsten Putz.