Plattdeutsche Nachrichten Plattdüütsche Narichten vun'n 8. März 2023

Bremen: Lüüd ut den öffentlichen Deenst op de Straat

Bremen: In de Binnenstädte vun Bremen un Bremerhaven sünd opstunns knapp dusend Lüüd, de in den öffentlichen Deenst arbeiden doot, op de Straat. Opropen hett de Gewarkschap verdi. Se will den Bund un de Kommunen in de jüst lopen Tarifrunn mehr Wind vun vörn geven. Överall in Düütschland sünd siet fröh an’n Morgen Warnstreiks in Gang. Mag ween, dat dorum nich allens rund löppt in Kinnergoorns, Krankenhüüs un bi den Müll.

Ukraine seggt: Nix to kriegen mit Angriff op Nordstream

Kiew: De Ukraine seggt: Se hett nix to kriegen dormit, dat verleden Johr de Gasrohren vun Nordstream angrepen worrn sünd. De Baas vun dat ukrainsche Präsidial-Kuntor Podolyak hett op Twitter schreven, Kiew harr bi de Saak in de Oostsee siene Finger nich in’t Speel, un se wüssen ok nich, wat dor lopen weer. De ARD un de „Zeit“ harrn mitkregen: Düütsche Beamte harrn rutfunnen, dat Teken op de Akschoon na de Ukraine wiest. Man dat gifft noch keen Henwies op de, de achter de Saak staht.

EU-Verteidigungsministers snackt över Munitschoon för de Ukraine

Stockholm: De Verteidigungsministers vun de EU snackt in Sweden över mehr Munitschoon an de Ukraine. Se sünd bang, de Artilleriegranaten kunnen dor bald utgahn. Wo se ok de Lagers vun de westeuropäischen Armeen opfüllen mööt, wüllt se all tohoop Munitschoon ordern. So harrn se dat ok al maakt, as se in de Corona-Pandemie Impfmiddel ranhaalt hebbt.

Kene Gas- un Öölheizungen mehr – vele gegen den Plaan

Berlin: Dat Bunnswirtschaftsminister Habeck plaant, dat vun tokamen Johr op an kene neen Gas- un Öölheizungen mehr inboot warrn dröfft, dat bekriddelt ok Lüüd ut de Wetenschap. De Wirtschaps-Weise Grimm meen, de Tiet-Plaan weer nich umtosetten. In de Süüddüütsche Zeitung sä se: Womööglich kunnen de Hüüs nich so gau op Schick bröcht warrn, un Warmspumpen kunnen nich so gau boot un inricht warrn. De Wirtschaps-Perfessersch meen, dorför schullen se den CO2-Pries för Warms ropsetten, dat sik dat mehr lohnt, ne‘e Heizungen optostellen.

Bremen: Werder is Mannschaft vun’t Johr

Bremen: Op en grote Festgala sünd güstern Avend de Bremer Sportlers vun’t Johr uttekent worrn. As „Mannschaft vun’t Johr“ hett en Jury de Mannslüüd vun Werder Bremen utwählt, wo de wedder in de eerste Liga opstegen sünd. Sportlerin vun’t Johr is de Hockey-Spelerin Lena Frerichs vun den Bremer Hockey Club worrn. As Sportler vun’t Johr hebbt se Werders Dischtennis-Speler Mattias Falck ehrt.

Dat Weer

Un woans süht dat mit dat Weer umto ut? Opstunns hebbt wi in Bremerhaven un Hooksiel 0 Graad, in Bremen un Bevers is dat 1 Graad över 0. Vundaag: Mal Sünnschien, mal dichte Wulken. Un vun de See her treckt de een oder anner Regen- oder Sneeschuer dör. In’t Binnenland blifft dat aver woll den ganzen Dag lang dröög. Dat Thermometer krabbelt op 3 bet 5 Graad. De Wind dorto weiht flau, eerst vun de süüdwesten Kant, gegen Middag dreiht he op Oost. Tokamen Nacht: Mal mehr, mal weniger Wulken. Eerst noch dröög. Na Middernacht kummt vun’t Ossenbrügger Mönsterland aver wedder Snee un Sneeregen op. Dat Ganze bi 1 Graad över 0 op de Inseln, anners 2 bet 4 Graad unner 0. Morgen: Mal Sünnschien, mal Wulken. Fröh an’n Morgen kann ok noch wat Snee oder Sneeregen daalkamen. Bi 4 bet 6 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Anja Guse.