Plattdeutsche Nachrichten Plattdüütsche Narichten vun'n 7. März 2023

Bunnesregeern will woll chinessche Technik bi Utboo vun 5G verbeden

Berlin – De Bunnesregeern will bi’n Utboo vun’n 5G-Nett woll verbeden, dat dar Technik ut China verboot ward. Dat hebbt NDR un WDR ut Sekerheitskreisen to weten kregen. Düsset „Nee“ kann orrig wat natrecken. Darachter stickt woll, dat de Bunnesregeern vunwegen de Sekerheit Bedenken hett un bang is, dat de chinesischen Anbeder to veel Macht op’n Markt kriegt.

Gewarkschaften sütt dusende Jobs in Gefohr

Berlin – Mehrere Industriegewarkschaften sütt wegen de hogen Strompriese in Dütschland hunnertdusende Arbeitsstäden in Gefohr. Vör allens in de Wertschuppsfelder, de veel Energie bruukt as de Stahl-, Chemie- or Boostuffindustrie köönt Jobs verloorn gehn or Städen dichtmaakt weern: darvör wahrschaut de IG Metall, de IG BCE un IG Boo. Se foddert een Industrie-Stroompries, de vun’n Staat ünnerstützt ward.

Bremer Stadtmusikantenhuus ward dürer as plaant

Bremen – De Bremer Senat befaat sik later mit de högeren Kosten för dat plaante Stadtmusikantenhuus. Bitnu hebbt se mit 10 Millionen Euro rekent, nu sünd dat bold 4 Millionen Euro mehr. De Koalitschonspartner Gröne un Linke hebbt darmit Probleme. De Linken-Politiker Rupp sä, dat se sik den Hüerverdrag wedder ankieken schüllt, wiel nu de Risiken alleen bi de Stadt liggt.

Bremer Beopdragte för Froons foddert mehr Geld för Froons

Bremen – De Beopdragte för Froons un dat Gliekstellen in’t Land Bremen, Wilhelm, foddert, dat mehr maakt ward, üm Froons beter to betahlen. Darachter stickt de internatschonale Dag för glieke Betahlung, de vundaag is. In’t Land Bremen wöörn Froons in’n Dörsnitt 20 Perzent weniger verdenen as Mannslüüd, sä Wilhelm. Dat liggt daran, dat Froons fakener in Jobs arbeidt, de slecht betahlt sünd or nich de vulle Tied. In Jobs, de een miteenanner verglieken kann, verdeent Froons 6 Perzent weniger.

Bremer Wahlamt laat AfD villicht nich to de Börgerschaftswahl to

Bremen – Dat Bremer Wahlamt laat de AfD villicht nich to de Börgerschaftswahl in’n Mai to. Een för allemal wüllt se daröver bit Midde März entscheden. Achtergrund is, dat sowohl de AfD-Nootvörstand as ok de Lannesvörstand je een egene Kandidaten-List op’n Disch leggt hebbt. Dat Wahlamt harr de beiden Sieten, de in Striet liggt, opfoddert, bit vundaag een Kandidaten-List trüchtotrecken, wiel blots een List tolaten weern kann.

Dat Weer

Un nu een Blick op dat Weer: in Deefholt 3, in Bremen, Bremerhaben un op Wangerooge sünd dat opstunns 4 Graad. Hüüt ward de Dag wulkig mit een beten Regen or Sneeregen hier un dar. To de Nordsee hen wesselt sik Sünn, Wulken un Sneeregen-, Snee- un Grisselgrussel-Schuers af. Kann ok Blitz un Donner geven – bi 4 bit 5 Graad. Tokamen Nacht kummt dat bi velen Wulken to Regen, Snee un Sneeschuers. Dat Thermometer sackt op plus 1 Graad op de Eilanden un minus 1 bit minus 4 Graad in’t Binnenland. Dat kann ok mal glatt weern. Morrn wesselt sik Sünn un dicke Wulken mit Regen- or Sneeschuern af, vör allens an de Küst – bi 4 bit 6 Graad. Donnerdag eher dröög mit Sünn un Wulken bi 4 bit 6 Graad. Dat weern de Narichten op Platt. Katrin Martens hett se tohoopstellt. Op platt trechtmaakt un vörleest hett se Heidi Jürgens.