Plattdeutsche Nachrichten Plattdüütsche Narichten vun'n 6. März 2023

Kabinett snackt över Energiewenn un Digitaliseren

Meseberg: De Bunnsregeern hett an Vörmiddag mit ehre Kabinettsklausur op Slott Meseberg in Brandenborg wiedermaakt. Eerst geiht dat üm de Stappen op den Weg to en Energiewenn. Dorbi sünd sik SPD, Gröönen un FDP nich ganz eenig, to´n Bispill över dat Verbott vun nee´en Öl- un Gasheizungen. Achterna, schall dat üm dat Digitaliseren un denken Maschinen gahn. Över dat, wat bi de Kabinettsklausur rutsuert, will de Ampelregeern an Namiddag informeren.

Jedeen teihnte Schoolafgänger in Bremen hett keen Afsluss

Bremen: Jedeen teihnte junge Minsch in Bremen hett achterna de Schooltiet, keen Afsluss. Dat see en Studie vun de Bertelsmann-Stiften ut un dormit is Bremen dat Slusslicht in Düütschland. An böverster Steed is Bayern mit en Quoot vun fief Perzent. In ganz Düütschland gung, in de Tiet wo de Studie leep, för rund
47.000 junge Lüüd de Schooltiet ahn Afsluss to Enn. Na de Studie weren dat ehrder Jungs un junge Lüüd ahn düütschen Pass.

Wissing will Boe vun nee´e Fohrradparkhüüs fördern

Berlin: Verkersminister Wissing will woll den Neebo vun Fohrradparkhüüs an Bahnhööv un annern Anhoolpunkten fördern. Na de Informatschoon vun dat Redaktschoonsnetwark Düütschland stellt he bet to dat Johr 2025 all tohoop 110 Millioon Euro praat. Dat Geld schall denn an Länner, Gemeenden, Verkersverbünn un Ünnernehmen gahn, de Radparkplätzen vörhollen. Veel Minschen würrn woll Rad un Bahn fakener bruken, wenn se ehr Fohrrad or E-Bike an den Bahnhoff seker afstellen köönt, so Wissing.

Regeernspartei winnt kloor Parlamentswahl in Estland

Tallinn: Bi de Parlamentswahl in Estland is de pro-europääsche Reformatschoonspartei vun Ministerpräsidentsch Kallas de Partei mit de mehrsten Stimm. Achterna all Stimmen uttellt worrn, keem se op 31,2 Perzent, de rechtspopulistsch EKRE-Partei liggt mit 16,1 Perzent op Platz twee. Wenn Kallas dat schafft, wedder en Koalitschoon tohoop to kriegen, würr dat den pro-europääschen Kurs vun dat baltische Land stabiliseren. Siet 2021 steiht Kallas an de böversten Steed vun de Regeern, se gellt as groote Stütt för de Ukraine.

20-Johriger steiht achterna en Gewaltverbreken in Bramsche ünner Verdacht

Bramsche: En 20-Johriger sitt nu achteran en junge Froo sturven is in dat neddersässche Bramsche achter Trallen, güstern wurr de Haftbefehl utschrieven. De junge Froo weer in de Nacht op Sünndag vun en Gebortsdagsfier verswunnen un later denn böös an Liev to schaden kamen opfunnt. Se is achteran in´t Krankenhuus sturven. De Mann, de dat woll doon hett, weer ok Gast op de Fier.

Dat Weer

Un nu kiekt wi op dat Weer: In Bremen hebbt wi null Graad, in Bremerhaben twee un Emm un Cuxhaben sünd dat opstunns dree Graad. De Dag geiht mit dicken Wulken, Regen un Snee los, man dat kann hier un dor glatt ween. Övern Dag wiederhen verenkelte Regen or Sneeregenschuer, twüschendör ok länger mal dröög, villicht mit en poor Lichtblicken. De Wind weiht flau vun de westlichen Kant, an Avend dreiht de opbrusen Wind op de süüdwesten bet süüden Kant . Dat Thermometer wiest us veer bet söss Graad. In de Nacht dicke Wulken, de Nedderlann schicken us Regen. Twuschen Werser un Elv ok mal natten Sneefall un dor kann dat glatt ween. Na Middernacht weniger Regen un ok weniger Wulken un dat denn bi twee bet null Graad. Dingsdag bringt dichte Wulken un wedder hier un dor Regen un Sneeregen. An de Nordsee wesseln sik Sünn, Wulken, Sneeregen, Snee, Grisselgrussel un mag ween ok Wintergewidder af. Dorbi wiest dat Thermometer veer bet söss Graad.

Dat weren de Plattdüütschen Narichten. Tohoopstellt vun Anja Guse. Op Platt trechtmaakt un vörleest vun Martina Brünjes.