Plattdeutsche Nachrichten Plattdüütsche Narichten vun'n 3. März 2023

Warnstreiks bremsen den Verkehr vun dichtbi ut

Bremen. In Bremen fahren vundag den ganzen Dag över kien Bussen un Bahnen. Grund is en Warnstreik in´n Staatsdeenst. Ok in Neddersassen gifft dat hier un dor to´n Deel Maleschen in den Verkehr vun dicht bi. De Gewarkschop Verdi will mit den Warnstreik Damp bi de Verhannels över de Tarife maken.

Fridays for Future roopt bunnswiet to Klimaprotesten op

Bremen. De Klimaschutz-Akschoons-Koppel Fridays for Future hett för vundag to en weltwieten Protest-Dag opropen. Alleen in Düütschland sünd mehr as 240 Demonstratschonen un Kundgaven ankünnigt. In Berlin, München, Frankfurt, Hamborg, Hannover – un ok in Bremen. Hier löppt jüst en Demonstratschoon dör de Binnenstadt.

Bunnskanzler Scholz drapt US-Präsident Biden

Washington. US-Präsident Biden begrööt an´n Avend Bunnskanzler Scholz in dat Witte Huus. Rund een Stünn lang willt sick de beiden ünner veer Ogen vör allen över den russ´sch Angreepkrieg gegen de Ukraine ünnerhollen. Dat hett de US-Regerung vermellt. För Scholz is dat de tweete Besöök in dat Witte Huus as Kanzler.

Eenmalplastik-Firmen mööt wat to Müllkosten togeven

Berlin. Firmen vun Produkten ut Eenmalplastik mööt af 2025 bi de Kosten för dat Affallwegmaken in´n Parks un op Straten wat dortogeven. De Bunnsdag hett de Extra-Afgaven an´n Avend fastleggt. Se stahn ünner annern för Wegsmiet-Koffibeker, Packmaterial för Eten or Zigarettenstummels an.

Seeslüüs Hooksiel warrt freegeven

Hooksiel. De Seeslüüs an´n Butenhaven vun Hooksiel warrt vundag freegeven. Dat hett de Havensellschop Neddersassen-Ports vermellt. Dormit kann de Slüüs in de tokamen Hoochtiet wedder vun Seilers un Freetietkaptains brukt weern. De Slüüs wurr dree Weken lang instand sett.

Dat Weer

Un nu noch en Blick op dat Weer: in Leer een, in’n Bremen-Mitt dree, in Bremerhaben veer un in Dörbern sünd dat opstunns een Graad. Hüüt fangt dat gries un diesig an. De Sünn schafft dat denn in´n Verloop jümmer mehr dör de Wulken. Hier un dor blifft dat aver wulkendüüster. De Wind weiht en beten bit in Maten. An de Küst to´n Deel starke Wind vun de Noordwesten- bit Westen Kant. Dat Thermometer wiest söven bit negen Graad. In de Nacht blots en poor Wulken. Later trecken jümmer mehr Wulken op un dat warrt gries. Hier un dor is Spütterregen möglich. De Temperaturen liggen bi twee bit fief Graad. Morn eerstmal vele Wulken un gries. Hier un dor kann dat natt vun baven kamen. An de Küst is hier un dor ok Sünnschien möglich. Acht bit söss Graad wiest denn dat Thermometer. Sünndag: Vele Wulken, Regenschuer un to´n Deel ok Sneeschuer. Dat gifft mehr Wind un is nattkoolt bi veer bit söss Graad.

Dat weern de Narichten op platt. Tohoopstellt hett Irene Lottes. Op Platt trechtmaakt un vörleest vun Markus Weise.