Plattdeutsche Nachrichten Plattdüütsche Narichten vun'n 2. März 2023

Scholz verdeffendert Ukraine-Politik in Regeernsverkloren

Berlin: Bunnskanzler Scholz hett de Krittelee an de Waffenfrachten för de Ukraine torüchwiest. Würr de Ukraine opholen sik to wehren, denn weer dat keen Freeden, sünnern dat Enn vun dat Land, wohrschaut he in sien Regeernsverkloren in den Bunnsdag. Dat dröff keen Freedenssluss över de Köppe vun de ukrainschen Minschen överweg geven. Scholz röppt China dorto op, keen Waffen an Russland to levern. De Kanzler hett vör meist een Johr, achterna den russchen Överfall op de Ukraine, en as he dat nöömt „Tiedenwenn“ utropen. Hüüt in sien Reed, hett he Bilanz trocken.

G20-Butenminister beraden över Ukraine-Krieg

Nee Delhi: Bi dat G20-Butenministerdrepen in Indien geiht dat ünner annern üm den Ukraine-Krieg, aver ok üm de weltwiede Energie- un Levensmiddelkris. An Anfang vun dat Drepen reep Indiens Premiereminister Modi de Deelnehmers vun den twintig böversten Natschoon op, tohoop to stahn. Bunnsbutenministersch Baerbock harr vörher en kloores Signaal in Richten Russland verlangt. Indien as Gastgever to´n Bispill harr sik betnu nich gegen de Regeern in Moskau stellt. Mit Buukkribbeln warrt op den Optridd vun den russche Butenminister Lawrow töövt.

Berliner SPD-Baversten stimmen för Verhanneln över en Koalitschoon mit de CDU

Berlin: In de Hauptstadt süht dat, achterna de Wedderholenswahl, na en Machtwessel ut. De SPD, de betnu mit de Gröön un den Linken tohoop regeert hett, will nu mit de CDU över en Koalitschoon verhanneln. Dat hett de SPD-Lannsvörstand güstern Avend beslaten. De regeernde Börgermeistersch Giffey verklort, düsse Besluss weer ut Respekt för dat Wahlresultat fullen, opletzt weer de CDU de kloore Wahlsieger. De CDU will hüüt övern Dag besluten, of se mit de SPD verhanneln.

Verdi röppt hüüt to Warnstreiks in Neddersassen op

Hannober: In Neddersassen gifft dat hüüt wiedere Warnstreiks in den Staatsdeenst. Mit dorbi sünd ünner anner Bus un Bahn un ok Kinnergoorns. Dat gellt för en ganzen Barg Städer in den süüdoosten vun Neddersassen, aver ok in Cuxhaben, Staad un Veern warrt dat Aktschoon geven. Morgen will sik ok de Bremer Straatenbahn AG an den Warnstreik de överall in de Bunnsrepublik vun de Gewarkschop Verdi stattfinnt, ansluten. Dorüm föhrt morgen den ganzen Dag keen Bussen un Straatenbahn in Bremen.

Jugendamt in Bremerhaben schall nee opstellt warrn

Bremerhaben: Dat Jugendamt vun de Stadt schall nich blots mehr Personaal kriegen, ok heel un deel nee opstellt warrn. Dat hett de tostännige Stadtraat för Jugend un Familie, Frost, bi buten un binnen künnig maakt. So schall en Kinnerschutz-Kru tohoopstellt, Arbeitsaflööp strafft un digitaler opstellt warrn. Vörweg wurr künnig, dat dat Jugendamt Bremerhaben foftig nee Steeden bruukt, vunwegen de Mitarbeiders nich mehr an de Opgaven passlich arbeiden köönt.

Dat Weer

Un nu kiekt wi op dat Weer: In Bremen, Bremerhaben un Cuxhaben sünd dat minus een Graad un in Emm hebbt wi opstunns null Graad. Hüüt fangt de Dag mit hoogen Daak an, laterhen kummt den taaghaftig de Sünn rut un dat blifft meist dröög. De Wind weiht flau, af un an ok licht böig vun de noordoosten Kant. Dat Thermometer schafft dat op veer bet söven Graad. In de Nacht seht wi eerst de Steerns funkeln mit en poor lütte Wulken, över Nacht denn mehr Wulken, daakig un dröög, un dat denn bi veer bet minus twee Graad. Freedag fangt eerst gries un diesig an, laterhen warrt dat fründlich un hier un dor schafft de Sünn dat denn ok mal to lachen. Dat Thermometer wiest us morgen söven bet negen Graad.

Dat weren de Plattdüütschen Narichten. Tohoopstellt vun Anja Guse. Op Platt trechtmaakt un vörleest vun Martina Brünjes.