Plattdeutsche Nachrichten Plattdüütsche Narichten vun'n 10. Februar 2023

Bunnsdag sett gauer Tostimmenverfohren för Infrastrukturprojekte in Gang

Berlin. De Bunnsdag hett gauer Tostimmverfohren ünner annern bi den Utbo vun nawassen Energien fastleggt. De Gesetzvörslag vun de Ampel-Koalitschoon süht vör, dat Gerichten in Strietfragen bi den Neebo vun Solar- un Windkraftanlagen gauer besluten könen. Gauer Gerichtsentscheden schall dat aver ok bi groden Infrastrukturprojekten geven, to´n Bispill bi den Utbo vun Schienen- un Stromtrassen, Gasrohren, Flegerhavens or bi bannig lange Straten.

Tall vun de Doden bi dat Eerbevern in de Törkei un Syrien stiegt wieder

Istanbul. De Tall vun de Doden is na dat slimme Eerbevern in dat törksch-syrisch Grenzland vun´n Mondag wieder anstegen. In de Twüschentiet weern nu mehr as 21.000 Dode mellt. Mittewiel hett de Weltbank de Törkei finanziell Hölp vun knapp 1,8 Milliarden Doller toseggt. Dormit schall de Infrastruktur in de Eerbevern-Gegend wedder opboot un den Minschen, de dat drapen hett, hölpen weern. De Törkei hett toseggt, twee wiedere Grenzövergäng na Syrien open to maken, dormit den Eerbever-Opfers in´n Noordwesten vun dat Naverland beter hulpen weern kann.

Amazon draff Arbeit vun Mitarbeiters kuntrulleren

Hannover. Amazon draff Daten vun de Arbeit vun de Mitarbeiters jümmerto optecken. Dat hett dat Verwaltungsgericht Hannover na en Vöroort-Termin in den Logistik Standoort Winsen/ Luhe fastleggt. Sinn vun dat Optecken vun de Daten is dorna de nootwennig Stüern vun logistisch Aflööp. Persönlich Egenschaften vun de Mitarbeiters warrt de Online-Verkoopsladen nich kuntrulleren. Na Menen vun dat Gericht hett dat Urdeel wohrschielich bunnswiede Bedüden.

Protesten bi de Schaffermahltiet

Bremen. In´t Rathuus versammeln sick an´n Namiddag wedder 300 Minschen to de Schaffermahltiet. Bi de 479. Oplaag vun de Traditschoons-Veranstalten richt to´n ersten mal en Fro as Schaffersche dat Fest mit ut. Ehrengast is Bunnsverkehrsminister Wissing. Klimaaktivisten hebbt dorüm Protesten ankünnigt. Se bekritteln de Verkehrspolitik vun Wissing as leeg för dat Klima. Bi dat Festeten över en poor Stünnen weern Spennen för dat „Huus Seefohrt“ in Bremen sammelt. Dat is en Sozialwark för Schipps-Törn, Kaptains un ehr Verwandten.

Havarerte Frachtschipp makt stünnenlang de Weser dicht

Bremen. En Schaden an de Maschien weer na Angaven vun de Polizei de Grund för en Havaree vun en Frachtschipp op de Weser. De 138 Meter lang BCC Utah weer op den Weg Richtung Noordsee, as sick dat Schipp gegen Klock negen an´n Avend dreiht hett un mit den Boog in de Waterkant in Nedderbüren fohren weer. Twee Slepper kunnen dat Schipp in de Nacht mit de Floot freesleppen un trüüch in den Neestädter Haven bringen. De Schippsverkehr weer all tohoop för fief Stünnen ünnerbraken.

Dat Weer

Un nu noch en Blick op dat Weer: in Emden vier, an’n Bremer Flegerhaben un in Bremerhaben dree un in Nienborg sünd dat opstunns twee Graad. Hüüt sünd faken dichte Wulken an´n Heven. Man in´n Verloop lockern de ok mal op un de Sünn kann viellicht mal dörkieken. Enkelte Drüppen sünd de Utnahm. De Wind weiht in Maten. An de Küst frische Wind vun de süüdwesten Kant. An´n Avend stieve bit störmsche Böen. Dat Thermometer wiest söss bit acht Graad. In de Nacht vele Wulken un en poor Drüppen bi dree bit fief Graad. Morn hett de Sünn dat swor dör de Wulken to kieken. Hier un dor is ok Spütterregen möglich. Acht bit thein Graad stahn denn op dat Thermometer. Sünndag: Dichte Wulken, wenig Sünnschien un blots hier un dor noch en poor Drüppen or en beten Regen. Dat Thermometer wiest acht bit thein Graad.

Dat weern de Narichten op platt. Tohoopstellt hett se Gabriele Intemann. Op Platt trechtmaakt un vörleest vun Markus Weise.