Plattdeutsche Nachrichten Plattdüütsche Narichten vun'n 3. Februar 2023

Slenskyj verlangt vör Drapen gaue Verhandlung üm dorbi to ween

Kiew. Vör dat EU-Ukraine-Drapen hett de ukrainisch Präsident Selenskyj noch eenmal gaue Verhandlungen för en EU-Bitritt vun sien Land verlangt. Se schullen noch in düsset Johr anfangen, dat hett sien Land verdeent, so Selenskyj. De Ukraine is siet Juni Bitrittskandidaat. In Kiew beraadt Selenskyj vundag mit EU-Kommisschoonspräsidentin von der Leyen un Ratspräsident Michel. Dorbi geiht dat nich blots üm de Opnahm vun de Ukraine in de Europäisch Union, man dat geiht ok üm noch mehr Hölpen in den Krieg gegen Russland.

Bunnsregerung will schienbor Leopard-1-Panzer freegeven

Berlin. De Bunnsregerung will schienbor dat Levern vun Leopard-Een-Kamppanzers an de Ukraine freegeven. As de „Süüddüütsche Zeitung“ vermellt, schöölt de Panzers ut Bestänn vun de Industrie kamen. De Rüstungsünnernehmen Rheinmetall un Flensborger Fohrtüg Sellschop wüllt dorna Dutzen vun Panzers vun den olen Typ „Leopard Een“ wedder kloor maken. Düsse köönt den an de Ukraine lefert weern. Formal is de Schritt aver noch nich.

Kind starvt bi Frachttogunfall in Recklingshausen

Recklinghausen. Op en Bahnstreek in dat Ruhrgebiet hett en Frachttog twee Kinner mitreten. En Jung vun thein Johr is dorbi sturven, en negen Johr old Kind hett böös wat afkregen. Dat vermellt de Polizei. Dat Unglück is in de Neegde vun den Hauptbahnhoff vun Recklinghausen passeert. Wo dat dorto kamen kunn, hebbt se noch nich rutfunnen. De Staatsafkaaten vun Bochum ünnersöken den Fall. De Binnenminister vun Nordrhein-Westfalen Reul, snack vun en groden Drama.

Tall vun de Wohngeldandrääg in Bremen is söss mal grötter worrn

Bremen. Siet den Anfang vun dat Johr hebbt rund 1.500 Minschen in Bremen en Eerstandrag op dat neje Wohngeld Plus stellt. As de Bobehöörd vermellt, sünd dat rund sössmal mehr Eerstandrääg as in´n Januar vun dat verleden Johr. Ok de Tall vun de neegsten Andräg is anstegen. Achtergrund is, dat de Tall vun de Lüüd, de Wohngeld tosteiht, dör en Gesetzännern mit den Anfang vun dat Johr düütlich tonohmen hett.

Gasspieker Rehden nimmt na Exploschoon wedder Bedrief op

Rehden. De gröttste düütsche Gasspieker in Rehden, in Neddersassen, is na en technisch Pann wedder in´n Insatz. Dat see en Sprekersche vun den Bedrief op „buten un binnen“-Anfraag. De Spieker in´n Kreis Deefholt weer vör twee Daag dichtmakt wurren. Dor keem dat to en Verpuffen. De Bunnsnettagentur vermellt, dat de Vörfall kien Bedüden för de Gasversorgung in Düütschland harr.

Dat Weer

Un nu noch en Blick op dat Weer: in Hooksiel acht, an’n Bremer Flegerhaben negen, in Bremerhaben acht un in Demorst sünd dat opstunns thein Graad. Hüüt Vörmiddag fallt faken Regen, vör allen twüschen Weser un Elv. An´n Middag or Namiddag schafft dat de Sünn dör de Wulken un dat blifft mehr un mehr drög. De Wind weiht frisch, an de Küst ok stark vun de west bit noordwesten Kant. Op datThermometer stahn denn acht bit thein Graad. In de Nacht trecken enkelte Regenschuer dör. De mehrste Tiet blifft dat bi weniger Wulken aver dröög. Dat Thermometer wiest twee bit fief Graad. Morn sünd vele Wulken an´n Heven, man de Sünn schafft dat af un an dör de Wulken to kieken. Dat blifft dröög bi fief bit söven Graad. Sünndag trecken vele Regenschuer dör dat Land. De Wind weiht ok noch dorto bi söss bit acht Graad.

Dat weern de Narichten op platt. Tohoopstellt hett se Anja Guse. Op Platt trechtmaakt un vörleest vun Markus Weise.