Plattdeutsche Nachrichten Plattdüütsche Narichten vun'n 2. Februar 2023

EU-Kommischoonspräsidentsch von der Leyen

Kiew: EU-Kommischoonsbaas von der Leyen is in de ukrainschen Hauptstadt un drippt sik dor mit Liddmaaten vun de ukrainsche Regeern. Dat geiht ünner annern üm en Weg wo man den russchen Angreepskrieg bestraft un üm den EU-Bitritt. Morgen finnt in Kiew dat
EU-Ukraine-Toppdrepen mit Präsident Selenskyj, von der Leyen un den EU-Raatspräsident Michel statt.

Maskenplicht in Bus un Bahn fallt weg

Berlin: In ganz Düütschland gellt vun hüüt af an keen Maskenplicht in Bus un Bahn mehr. Bi den Verkehr na wiet weg vun de Düütschen Bahn, aver ok bi Bus un Bahn in Bremen un Neddersassen bruukt Fohrgäst nu keen Mask vör Mund un Nees mehr optosetten. To glieke Tiet sünd nu ok de Corona-Regeln bi de Arbeit, so as Hygieeneplaanpapeere un Regeln, dat man vun tohuus ut arbeiten kann wegfullen.

Schoolmesterverbänn in Neddersassen bekriddeln plaante Akschoon gegen Ünnerrichtsutfall

Hannober: Schoolmesterverbänn in Neddersassen bekriddeln de Plaans vun de Lannsregeern gegen Ünnerrichtsutfallen. Kultusministersch Hamburg will ünner annern wedder mehr Schoolmester an Schoolen bringen, an den besünners veel Steeden nich besett sünd. Dat warrt veel Oprohr geven, heet dat vun den Verband neddersässche Schoolmester.

Bremer Gröönen fangen mit Börgeschafts-Wahlkampf an

Bremen: De Gröönen fangen an Avend mit den Wahlkampf för de Börgerschaftswahl an. Bi en Neejohrsbegröten warrt mit de Bunnsvörsittersch Lang rekent. Tosamen mit de Bremer Toppkandidaatsche Schäfer will se de Gröön op de Wahl in Mai instimmen.

München is in den DFB in´t Viddelfinaal

Mainz: Bayern München is in dat Viddelfinaal bi den DFB-Pokaal. De Düütsche Rekordmeester harr gegen Mainz in´t Achtelfinaal mit 4 to 0 de Nees förn. Man ok Leipzig is wieder un twars mit 3 to 1 gegen Hoffenheim. De annern Achtelendspeelen warrn in de tokamen Week utricht.

Dat Weer

Un nu kiekt wi op dat Weer: In Rottenborg sünd dat 4 Graad, in Bremen un Bremerhaben 5 Graad un in Emm sünd dat opstunns 6 Graad. Hüüt fangt de Dag mit enkelte Regenschuer un Wulken an. An Namiddag rullen vun´t Emsland her dicke Wulkenfeller ran, de denn över Namiddag un an Avend Regen bringen. De Wind weiht flau bet in Maaten eerst vun de westen bet noordwesten Kant, laater denn von de süüd bet süüdwesten Kant. Dat Thermometer wiest dorbi 6 bet 7 Graad. In de Nacht breed sik de Regen vun dat Emsland bet to de Elv ut, un dat denn bet in de tweeten Nachthälv. Na´n morgen hen ist dat taaghaftig dröög, man de een or annere Schuer is liekers dorbi un dat denn bi 6 bet 8 Graad. Freedag wedder mehr Regen, in´ne Hauptsaak twuschen Werser un Elv. An Middag or Namiddag is dat vun de Küst her ok mal blau mang de Wulken un dor is dat denn dröög. Morgen is dat puustig un mild mit 8 bet 10 Graad.

Dat weren de Plattdüütschen Narichten. Tohoopstellt vun Irene Lottes. Op Platt trechtmaakt un vörleest vun Martina Brünjes.