Plattdeutsche Nachrichten Plattdüütsche Narichten vun'n 1. Februar 2023

Habeck is gegen Kampflegers für de Ukraine

Berlin: Viezkanzler Habeck is dorgegen, Kampflegers an de Ukraine to levern. In dat ZDF see he an Avend, dat weer een Drahtseelakt twuschen de gröttste Stütt för de Ukraine, ahn dat Düütschland dorbi sülvst as Kriegspartei gellt. Nich ganz kloor weer, wo dor de Lienen lang leep, so Habeck.

Kabinett will 49-Euro-Billjet op´n Weg bringen

Berlin: Dat Bunnskabinett snackt hüüt över dat 49-Euro-Billjet. Dorbi schüllt wohrschienlich de nödigen finanziellen Middel op´n Weg brocht warrn. Dat Billjet för Bus un Bahn, wat för ganz Düütschland gellt, schall na de Plaans an eersten Mai losgahn.

Keen Corona-Isolatschoonsplicht mehr in Bremen und Neddersassen

Bremen: In Bremen un Neddersassen gellt vun hüüt af an keen Corona-Isolatschoonsplicht mehr. Wer sik mit dat Coronavirus infizeert hett, mutt nich mehr dwingend tohuus blieven. Vun morgen af an, fallt butendem ok de Maskenplicht in Bus un Bahn weg. Wiederhen mutt jedeen in Krankenhüüs, Pleeghüüs, bi Dokters un in annere medizinschen Inrichten en Mask för Mund un Nees drägen.

Verpuffung an den Gasspieker Rehden

Deefholt: In den Gasspieker Rehden in den Kreis Deefholt, kann in Momang keen Gas mehr spiekert warrn. De Anlaag wurr vörsichtshalver afschalt. Dat liggt an en Verpuffung, woso dat passert is, is betnu noch nich kloor. De Bunnsnettagentur meent aver liekers, dat för Düütschland dat Gas nich knappt warrt. De Anlaag is de gröttste Gasspieker in Düütschland.

Lotto-Millioon gaht na Bremen

Bremen: In dat Bunnsland Bremen hett en Glückspilz rund 107,5 Millioon Euro bi den Eurojackpot wunnen. Dat hett de Westdüütsche Lotterie an Avend künnig maakt. Dat wat düsse Minsch wunnen hett, is en vun de hööchsten Summen, de betnu bi den Eurojackpot utbetahlt wurr.

Dat Weer

Un nu kiekt wi op dat Weer: In Bremen, Bremerhaben, Emm un Möppen hebbt wi överall söss Graad. Hütt is dat Weer mal so mal so. Veel Wulken, jümmer mal wedder Regenschuer or ok Grisselgrussel, man ok Blitz un Donnerslag mag dorbi ween. Twüschendör seht wi ok mal de Sünn. De Wind weiht in Maaten bet frisch, an de Küst stark vun de westen Kant. Dorbi breden sik in´t  Binnenland störmsche Böen un Stormböen ut. An de Küst un wenn dat kräftig pladdert, sünd ok starke Sturmböen vun 90 bet 105 Stünnenkilometers mööglich. Dat Thermometer schafft dat op 6 bet 7 Graad. In de Nacht mal mehr mal weniger Wulken, hier un dor Regen, Sneeregen or Grisselgrussel. Över Nacht is dat denn ok mal länger dröög un dat denn bi 5 bet 3 Graad. Morgen startet de Dag wulkig mit enkelte Schuers, man ok Grisselgrussel un Sneeflocken sünd dorbi. An Namiddag rullen vun dat Emsland her dicke Wulkenfeller ran, de an Namiddag un Avend Regen bringen. Dat Thermometer wiest us 6 bet 7 Graad.

Dat weren de Plattdüütschen Narichten. Tohoopstellt vun Katrin Martens. Op Platt trechtmaakt un vörleest vun Martina Brünjes.