Plattdeutsche Nachrichten Plattdüütsche Narichten vun'n 31. Januar 2023

Frist för’t Afgeven vun Grundstüer geiht to Enn

Berlin: Hüüt geiht de Frist för dat Afgeven vun de Grundstüerverklaren to Enn. Bunnswiet hebbt bet Sünndag eerst meist twee Drüddel vun de Immobilienbesitzers de Verkloren afgeven. In Bremen un Neddersassen löppt dat’n beten beter: Neddersassen liggt licht doröver. In Bremen sünd dat sogaar meist Dreeviddel. Wokeen de Frist verstrieken lett, ward toeerst noch mal schriftlich dorop henwiest. Eerst dorna gifft dat ok Toslääg as Straaf.

Tall vun Lüüd ahn Arbeit in Bremen un Neddersassen licht anstegen

Bremen: In’n Januar is de Tall vun Minschen ahn Arbeit licht anstegen un liggt nu bi 2 Millionen 616 Dusend. Dat is en Arbeitslosenquoot vun 5,7 Perzent. Dat hett de Bunnsagentur för Arbeit vermellt. In’n Vergliek mit anner Länners is de Quoot in Bremen mit 10,5 Perzent an’n hööchsten. Dat sünd üm un bi 38.200 Minschen ahn Arbeit. In Neddersassen weern meist 253.400 Minschen ahn Arbeit, de Quoot liggt hier bi 5,8 Perzent.    

Wirtschaftsminister Habeck besöökt Windkraftünnernehmen in Cuxhaben

Cuxhaben: Bunnswirtschaftsminister Habeck besöökt hüüt dat Windkraftünnernehmen Siemens Gamesa. He kiekt sik dor en Produkschoonshall an. In dat Wark ward siet 2017 Hoochleistungsturbinen för Windkraftanlagen op See boet. De Bunnsregeern will bet 2030 de Windkraft op See op 30 Gigawatt utboen. Opstünns sünd dat eerst üm un bi 8 Gigawatt.   

Bremer Senaat will Utbildungsfond afnicken

Bremen: Ünnernehmen, de utbillt, schüllt in Bremen un Bremerhaben in Tokunft Extra-Geld för elkeen Lehrling kriegen. De Bremer Senaat will dorför an’n Vörmiddag en Utbildungsfond afnicken. All Ünnernehmen in Bremen un Bremerhaben mit tominnst fief Mitarbeiders schüllt dor inbetahlen. Dat Geld schall denn an de Ünnernehmen ümverdeelt warrn, de utbillt.

Mööglicherwies Wulf in Weyh ünnerwegens

Hannover: Dat Ümweltministerium in Hannover hollt dat för mööglich, datt opstünns en Wulf dör den Kreis Deefholt striekt. Mehrere Minschen ut Weyh hebbt an’t Weekenenn en Wulf in verscheden Delen vun de Gemeend mellt. En Spreker vun dat Ümweltministerium säe, datt in’n Januar de Paarungstiet för de Wülv anfangt. Denn kann dat passeern, datt de Deerten bi dat Söken na Partners wiete Strecken trüchleggt.

Dat Weer

Un nu en Blick op dat Weer: In Nordholt 4, in Bremen, Bremerhaben un Cuxhaben 5, un in Emmen un op Borkum sünd dat opstünns 6 Graad. Hüüt Vörmiddag fallt ut dichte Wulken vun de Noordsee her Regen. Över’n Namiddag treckt de Regen na de Elv un de Lüneborger Heid af, un de Wulken lockert vun Oostfreesland her wedder’n beten op. Enkelte Schuers kann dat liekers noch geven bi 7 bet 8 Graad. In de Nacht sünd de Wulken mal mehr, mal weniger dicht, un besünners Oosten de Werser sünd noch enkelte Schuers ünnerwegens. Later in de Nacht treckt vun de Noordsee her mit dichte Wulken Regenschuers in’t Land. Dat Thermometer fallt op 5 bet 4 Graad. Morgen gifft dat wieterhen unstadig Weer mit veele Wulken un jümmer wedder deegte Regen- oder Grisselgrusselschuers. An’n Namiddag kann dat ok korte Gewidder geven. Af un an lockert dat för korte Tiet op mit’n beten Sünnschien bi 6 bet 7 Graad.

Dat weern de Narichten op platt. Tohoopstellt hett se Irene Lottes. Op Platt trechtmaakt un vörleest vun Marc Gelhart.