Plattdeutsche Nachrichten Plattdüütsche Narichten vun'n 30. Januar 2023

Kanzler bekrittelt Snacken över Kampffleger

Berlin – Bunneskanzler Scholz hett dat Snacken över dat Levern vun Kampffleger an de Ukraine bekrittelt: nu geiht dat darum, eernsthaftig daröver to diskereern un sik nich gegensiedig to överbeten. He sülfst harr allens darto seggt. SPD-Böverste Esken harr in’n Bericht ut Berlin een Levern vun Kampffleger nich heel un deel utsloten.

Türkei sett wieter een P vör dat Rinkamen vun Sweden in de Nato

Ankara – De türkische Präsident Erdogan hett andüdt, dat sien Land blots Finnland in de NATO seen will un darto „Jo“ seggen wöör. Sweden schall wieter nich rinkamen, na sien Meen. Egens wüllt de beiden Länner wegen den russischen Krieg in de Ukraine tohoop in de NATO rinkamen. De Türkei foddert vun Sweden all länger, dat se de Kurden duller an de Kandar nehmen schüllt – se wart vun Ankara as Terroristen ankeken.

Bunnesfinanzhoff weist Klaag gegen Soli af

München – De Bunnesfinanzhoff in München hett een Klaag gegen den Solidaritätstoslag afwiesen. De Afgaav wees nich gegen de Verfaten. Dat hebbt de Richter vun dat höchste dütsche Finanzgericht just in München entscheden. Darmit is een Klaag vun een Ehepaar ut Bayern afwiesen worrn – un de Bunnesregeern kann wieter mit Innahmen ut’n Soli in tweestellige Milliardenhöögde planen.

Busse in Bremerhaben fohrt wedder fakener

Bremerhaben – Vun hüüt an fohrt dat Verkehrsünnernehmen Bremerhaben Bus wedder fakener. Vun Klock 6 in de Fröh bit Klock 7 an’n Abend gellt op de beiden Hauptlinien vun nu an wedder de 10-Minuten-Takt. Siet August sünd de Busse an’n Vörmiddag blots noch alle fofftein Minuten fohren. De Grund weer, dat to vele Mitarbeiders krank weern.

Dütsche Hockey-Speler sünd Weltmeister

Bhuba-Neschwar – De dütschen Hockey-Herren sünd Weltmeister. In’t Endspeel in Indien hebbt se gegen Belgien in’t Penalty-Scheten mit 5 to 4 wunnen. Dat is de erste Titel för dat dütsche Team siet 17 Johren.    In de Football-Bunnesliga hett Dortmund bi Leverkusen mit 2 to 0 wunnen. Schalke un Köln sünd vördem mit een 0 to 0 ut’nanner gahn.

Dat Weer

Un nu een Blick op dat Weer: in Bremen, Bremerhaben, Deefholt un op Wangerooge överall sünd dat opstunns 6 Graad. Hüüt Vörmiddag treckt wedder dicke Wulken op, de vele, to’n Deel ok dulle Regen- un Grisselgrusselschuers bringt. Kann ok Blitz un Donner darbi ween un dartwüschen schient ok mal de Sünn – bi 6 bit 8 Graad. Tokamen Nacht treckt de Schuers af un darachter blifft dat meist dröög. Dat Thermometer sackt op 5 bit 3 Graad. Morrn kummt bi dicken Wulken in de Fröh vun de Nordsee her Regen op, de bit to’n Vörmiddag jümmer mehr wart. An’n Namiddag kann dat mal een beten oplockern, ehrdat dat wedder natt vun baben kummt – bi 6 bit 8 Graad. Middeweken blangen dicken Wulken ok mal een beten Sünn, wieter bi 6 bit 8 Graad. Meist överall stürmsche Boijen un Stormboijen in’t Binnenland un sware Stormboijen to de See hen! Dat weern de Narichten op Platt. Ralph Stölting hett se tohoopstellt. Op platt trechtmaakt un vörleest hett se Heidi Jürgens.