Plattdeutsche Nachrichten Plattdüütsche Narichten vun'n 27. Januar 2023

Bunnsregierung bi Klimaschuul nich enig

Berlin. De Ampel-Regerung ut SPD, Grönen un FDP diskerert wieder över de Themen Autobahn-Neebo un Klimaschuul. Bi en Drapen von den Koalitschoons-Böversten is nix rutkamen. De FDP will dat Verfohren för dat Tostimmen vun ne´e Autobahnen gauer maken. Dat wüllt de Grönen nich dörgahn laten, se seht de Tele bi de Klimaschuul in Gefohr.

Wieder Warnstreiks bi de Post

Bremen. Wokeen vundag op Breven or Paketen töövt, warrt wohrschienlich in Bremen un Neddersassen dalslagen ween. De Gewarkschop verdi hett all Breev- un Paketboden vun de Düütschen Post to´n Warnstreik opropen, üm Druck in den Tarifstried to maken. Dat is al dat tweete Mal binnen een Week. Verdi will för de rund dartig-dusend Mitarbeiters en Lohntowass vun foffthein Perzent dörsetten.

Training vun ukrainisch Suldaten fangt in Düütschland an

Köln. In Düütschland sünd de eersten ukrainisch Suldaten för en Utbildung an den Schüttenpanzer Marder ankamen. De Koppel is al güstern in Köln lannen un schall bald mit dat Training an dat Wapensystem anfangen. De Utbildung is Deel vun de Militärhölp för de Ukraine. De schall veertig Marder kriegen. Wannehr de Utbildung vun Suldaten an den Kamppanzer Leopard anfangen schall, is noch nich kloor. Ok de sworen Leopardpanzer schallen an de Ukraine levert weern.

Ünnersöken bi de Bremer Bäder

Bremen. De Sportdeputatschoon vun de Breemschen Börgerschaft hett över de Ünnersöken gegen de Geschäftsleid vun de Bremer Bäder diskereert. Dor is woll wat bi den Ümbo vun dat Ohtee-Bad in Bremen-Osterholt scheef lopen. Ok hebbt se dor woll nich richtig mit Asbest hanteert. Sport-Staatsrat Jan Fries vun de Grönen see bi dat Sonderdrapen, he süht in Ogenblick kien Grund, de Geschäftsföhrerin vun de Bremer Bäder aftopropen. Man dat verlangt de CDU.

Denkdag to´n Holocaust

Ollenborg. Ok in Neddersassen warrt vundag an de Opfers vun den Natschonalsozialismus dacht. In Ollenborg warrt to´n Bispill an de 74 Sinit dacht, de 1943 na Ausschwitz deporteet wurren. Bremen hett sick al güstern Avend bi en zentral Veranstalten in´t Rathuus an dat Befreen vun dat Konzentratschoonslager Ausschwitz vör 78 Johren besinnt.

Dat Weer

Un nu noch en Blick op dat Weer: in Nienborg un an’n Bremer Flegerhaben veer, in Bremerhaben dree un in Beverst sünd dat opstunns veer Graad. Hüüt fangt de Dag mit Wulken an. An´n Vörmiddag gifft dat eerste Löcker in den Wulken un de Sünn kann en beten dörkieken. De Wind weiht en beten bit in Maten. An de Küst starke Böen vun de nordoosten Kant. Dat Thermometer wiest dree bit veer Graad. In de Nacht billen sick Nevelfeller. An de Küst kann dat hier un dor weniger Wulken geven. Man dat blifft dröög bi minus fief bit plus een Graad. Morn meist dichte Wulken. Dat is gries un dat blifft wietgahns dröög. Blots hier un dor kann de Sünn dör en Wulkenlock schienen. Een bit veer Graad stahn denn op dat Thermometer. Sünndag: Vele Wulken, aver kuum Regen bi dree bit söss Graad.

Dat weern de Narichten op platt. Tohoopstellt hett se Ralph Stölting. Op Platt trechtmaakt un vörleest vun Markus Weise.