Plattdeutsche Nachrichten Plattdüütsche Narichten vun'n 25. Januar 2023

Kanzler Scholz gifft Antwoorten in den Bunnsdag

Berlin: Bunnskanzler Scholz warrt sik an’n Middag in den Bunnsdag Fragen anhören un Antwoort geven. Bavenan geiht dat woll dorum, dat Leopard-2-Panzers na de Ukraine levert warrn schüllt. An’n Namiddag gifft dat dor ok en Aktuelle Stunn to. Weken harr dat duert, man nu warrt Düütschland woll Verlööf geven, dat anner Länner den Kampfpanzer wiedergeevt un dat ok Düütschland sülvst Leopard-Panzers na de Ukraine levert.

Verkehrsgerichtdag geiht in Goslar los

Goslar: An’n Namiddag fangt de Düütsche Verkehrsgerichtsdag an. Fachlüüd ut Justiz, Wetenschap, Behörden un Verbännen snackt dree Daag lang över Verkehrsrecht, Verkehrssekerheit un anner Saken, de jüst anstaht. Dor höört düt Johr de E-Scooter to, dat moderne Autos Daten sammelt un öllere Lüüd in’n Stratenverkehr. An’t Enn gifft de Kongress Vörslääg an den Gesetzgever rut.

Bremerhaven: Justiz mutt wieder gegen Oberbörgermeister Grantz unnersöken

Bremerhaven: De Justiz mutt wieder gegen Oberbörgermeister Grantz vörgahn. Dat hett de Generalstaatsanwaltschap op Andrag vun de Partei „Börgerslüüd in Woot“ fastleggt. Grantz warrt vörsmeten, dat he nich na dat Recht vörgahn is. Seggt warrt, he harr för de fröhere Leiterin vun dat Sozialamt en ne’e Steed inricht. De Oberbörgermeister seggt: Dat is nich wohr.

Bremen un Neddersassen: Weniger wüllt Schandarms warrn

Bremen: Verleden Johr hebbt sik bi de Polizei in Bremen weniger Mannslüüd un Froens mellt, de Schandarm warrn wullen. 2019 weren dat mit mehr as 2300 so veel as noch nie, in dat Utbildungsjohr 2021/22 weren dat man knapp 1500. In düssen Johrgang is dat nich veel anners. Ok in Neddersassen wüllt gegen 2019 kloor weniger Lüüd Schandarms warrn.

Füer in Aschammer löppt röver op de Ne’e Oberschool in Gröpeln

Bremen: In Gröpeln hett dat güstern Avend an de Ne’e Oberschool brennt. En Aschammer blangen dat Huus in de Humannstraten weer in Flammen. Lüüd, de dor wahnt, hebbt denn de Füerwehr anropen. Över en Schacht hett sik dat Füer na dat Dack vun de School henfreten. 60 Füerwehrlüüd weren dor an’t Löschen. Woso dat Füer in Gang kamen is, is noch nich kloor. De Polizei ünnersöcht de Saak.

Dat Weer

Un woans süht dat mit dat Weer umto ut? Opstunns hebbt wi in Kneten 2 Graad unner 0, in Bremen, Bremerhaven un Weyerbarg is dat 1 Graad unner 0.

Vundaag: En Barg dichte Wulken, gegen de de Sünn meist gor keen Schangs hett. Dat blifft aver dröög. An’n Avend kummt in Oostfreesland Regen op. Dat Thermometer krabbelt op 0 bet 2 Graad. De Wind dorto weiht flau oder en beten mehr vun de süüdwesten Kant, an de See ok frisch. Tokamen Nacht: Vun de See treckt Regenwulken rin. In’t süüdliche Binnenland kann ok natten Snee daalkamen. Un dor kann dat glatt warrn. Bi 1 Graad över 0 bet minus 2 Graad. Morgen: De Regen un de Snee treckt gau na Süden af. Noch vör Middag is dat dröög. Vun de See her lockert de Wulken op, un wi kriegt sogoor de Sünn to sehn. Bi 4 bet 7 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Irene Lottes.