Plattdeutsche Nachrichten Plattdüütsche Narichten vun'n 24. Januar 2023

Umweltschützers verklaagt Bunnsregerung

Berlin: Umweltschützers hebbt en Klaag gegen de Bunnsregerung op’n Weg bröcht, wo de nich noog gegen den Klimawannel maakt. In de Süüddüütsche Zeitung steiht to lesen: De Bund för Umwelt un Naturschutz seggt: enige Ministerien hebbt de Gesetzen nich inhollen – afsünnerlich bi Verkehr un Boen. De Klaag schall de Ampelregerung dorto bringen, dat se mit Programmen mehr för den Klimaschutz deit.

Industrie kunn in’t Vörjohr Leopard-Panzers levern

Berlin: De Rüstungskunzern Rheinmetall seggt: Ja, se kunnen bet 139 Leopard-1- un 2-Panzers levern. Mit't Utlevern anfangen kunnen se in’n April oder Mai. Ok in Berlin geiht dat vundaag woll um düsse Panzers. Bunnsverteidigungsminister Pistorius sett sik an’n Vörmiddag mit den Nato-Generalsekretär Stoltenberg an een Disch.

Bremen: Blindgänger ünner Kuntrull sprengt

Bremen: In Bremen-Nord is verleden Nacht en Bomb ut den Tweten Weltkrieg sprengt worrn. Sowat 2500 Lüüd, de dor wahnt, müssen ut jemehr Hüüs un Wahnungen rut. An’n Morgen kunnen se wedder trüch. De engelsche Flegerbomb harrn se güstern Avend in Blomendal funnen – op dat Flach vun dat fröhere Tanklager Farge.

Bremen: Maskenplicht bi’n Dokter blifft

Bremen: Gesundheitssenatersch Bernhard hett kloormaakt: Ja, se is dorför, dat Lüüd in de Praxis vun en Dokter ok in Tokunft en Mask opsett. Dat hett se bi buten-un-binnen seggt. Vörher harr de Verenigung vun de Kassendokters un ok Huusdokters verlangt: De Regelung schall nich mehr gellen in de Praxis un in anner Medizin-Hüüs.

Stadtbörgerschap snackt över Laag bi dat Bremer Jugendamt

Bremen: Bi dat Bremer Jugendamt grummelt dat mehr un mehr. Fröh an’n Namiddag faat de Stadtbörgerschap de Saak an. De CDU-Frakschoon harr en Andrag stellt för en aktuelle Stunn to dat Thema. Se smitt den Senat vör, de kümmert sik nich noog dorüm, dat de Kinner dat goot geiht. De Leiter vun dat Jugendamt, Grönert, seggt: De Mitarbeiders vun de Behöörd hebbt opstunns veel to veel to doon.

Dat Weer

Un woans süht dat mit dat Weer umto ut? Opstunns hebbt wi in in Bremen un Deefholt 2 Graad, in Bremerhaven un Cuxhaven sünd dat 3 Graad. Vundaag: Vör allen düüster un gries. Man dat blifft woll doch dröög. Gegen Middag oder an’n Namiddag kann sik hier oder dor ok de Sünn mal wiesen. Dat Thermometer krabbelt op 2 bet 4 Graad. De Wind dorto weiht flau vun de oosten Kant, an de See vun’t Land her, also vun Süüd. Tokamen Nacht: De Wulken treckt mehr un mehr tohoop. Dat warrt dakig un gries. Dröög bi 1 Graad över 0 bet minus 3 Graad. Morgen: Dichte Wulken, eerst ok noch wat dakig. De Sünn will nich rut, man dat blifft dröög. An’n Avend kummt in Oostfreesland Regen op, de sik bet na de Werser un Aller schuven deit. Bi 1 bet 3 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Katrin Martens.