Jetzt läuft:

Edwin Starr War
  • Als nächstes läuft:

  • Um 18:27 Uhr läuft: the Mamas and the Papas I Call Your Name
  • Jetzt läuft:

    Edwin Starr War
  • Davor lief:

  • Um> 18:19 Uhr lief: Barrett Strong Money (That's What I Want)
  • Um> 18:15 Uhr lief: Uriah Heep Silver Sunlight
  • Um> 18:09 Uhr lief: Status Quo Gotta Get Up And Go
  • Um> 18:05 Uhr lief: Alice Cooper Hello Hooray
  • Um> 17:55 Uhr lief: Eiffel 65 Blue (Da Ba Dee)
  • Um> 17:46 Uhr lief: David Bowie Absolute Beginners
  • Um> 17:41 Uhr lief: Bob Marley No Woman, No Cry
  • Um> 17:38 Uhr lief: Michael Patrick Kelly Roundabouts
  • Um> 17:34 Uhr lief: OMD Maid Of Orleans (Joan Of Arc)

Beat-Club mit Lutz Hanker

Plattdeutsche Nachrichten Plattdüütsche Narichten vun'n 23. Januar 2023

Ein rot-weißer Leuchtturm zwischen Dünen. Dahinter ein blauer Himmel mit ein paar Wolken.

Plattdüütsche Narichten vun'n 23. Januar 2023

Alfred-Wegener-Institut treckt in Nordsee-Verwaltungshuus +++ Öösterrieksch Autor kriggt Bremer Literaturpries +++ Footgänger na Unfall mit Auto doodbleven

Bild: Radio Bremen

Informationen zum Audio

Baerbock is mit Levern vun Panzern ut anner Länner inverstahn

Paris: Bunnsbutenministersche Baerbock is mit dat Levern vun Leopard-Panzern vun Polen an de Ukraine inverstahn. Baerbock säe to en franzöös’schen Sender, datt de Bunnsregeern betto noch nich fraagt worrn is. Wenn sik dat ännert, wüllt se dat Wietergeven aver nich in’n Weg stahn. Polens Ministerpräsident Morawiecki hett künnigmaakt, datt se Leopard-Panzer ut düütsche Produktschoon in’n Twiefel ok ahn Tostimmen vun Düütschland an de Ukraine wietergeven wüllt.

Bunnsregeern gifft Ziel för Wahnungsbo op

Berlin: De Bunnsregeern gifft ehr Ziel op, datt se 400.000 nee‘e Wahnungen in’t Johr boen wüllt. Boministersche Geywitz säe to dat Narichtenportal „Web News“, datt se düsse Tall woll ok in dütt Johr nich schaffen ward. Ok dör de staatliche Stöhn is de Tall vun Neeboten, de egentlich bruukt ward, opstünns nich to schaffen, säe Geywitz wieter. Eerst vun 2024 an is dat villicht mööglich. Na Menen vun Geywitz liggt dat an Maleschen dör den Ukraine-Krieg, de högere Tinsen un Probleme bi’t Levern mit sik bröcht hett.     

Alfred-Wegener-Institut treckt in’t fröhere Nordsee-Verwaltungshuus

Bremerhaben: De fröhere Verwaltungsbo vun den Nordsee-Konzern in Bremerhaben ward to en Wetenschaftszentrum. Dat Huus schall an’n Vörmiddag offiziell an dat Alfred-Wegener-Institut för Polar- un Meeresforschung övergeven warrn. De Bo is tovör vun de landsegen Fischereehaben-Bedrievsgesellschaft för üm un bi 7,5 Millionen Euro op Schick bröcht worrn. Direkt blangenan schall dat so nöömte Technikum vun dat Institut boet warrn – en Neebo, in den de Wetenschaftler in Tokunft grode Forschungs-Utrüstungen utklamüstern un testen wüllt.   

Öösterrieksch Autor kriggt Bremer Literaturpries

Bremen: In’t Bremer Raathuus ward an’n Middag de 69. Bremer Literaturpries vergeven. De öösterrieksch Autor Thomas Stangl kriggt den Pries för sien Romaan „Quecksilberlicht“. Dorin sett he Biografien ut verscheden Johrhunnerten in Bruchstücken tosamen. Mit den Pries gifft dat 25.000 Euro. He hett en goden Namen un ward siet 1954 an Schrieverslüüd vergeven, de in düütsche Spraak schrievt.    

Footgänger na Unfall mit Auto doodbleven

Vechte: In Holdorp in’n Landkreis Vechte is an’n Avend en Footgänger to Dode kamen. De 71-Johrige weer buten de Oortschaft an’n Stratenrand ünnerwegens, as em en Auto faatkregen hett. Na Angaven vun de Polizei hett de Autofohrer den Mann an’n düüstern Fohrbahnrand nich sehn.

Dat Weer

Un nu en Blick op dat Weer: In Bremführ un Nordholt 1, in Bremen, Bremerhaben un Emmen 2, un in Dörveern sünd dat opstünns 3 Graad. Hüüt blifft de Heven meisttiets gries, aver dröög. Över Dag kann tominnst af un an mal de Sünn rutkamen. De besten Schangsen dorför gifft dat an de Noordsee. De Temperaturen liggt bi 3 bet 4 Graad. In de Nacht is dat locker bet dicht wulkig. Hier un dor gifft dat Daak. Meisttiets blifft dat dröög, blots hier un dor kann dat enkelte Druppen geven bi 0 bet -2 Graad. Morgen gifft dat blangen de Feller mit Daak un hogen Daak tominnst hier un dor ok Sünnschien. Dat blifft dröög bi 2 bet 4 Graad.

Dat weern de Narichten op platt. Tohoopstellt hett se Katrin Martens. Op Platt trechtmaakt un vörleest vun Marc Gelhart.