Plattdeutsche Nachrichten Plattdüütsche Narichten vun'n 13. Januar 2023

Lambrecht snackt mit Rüstung över Puma-Maleschen

Berlin: Över dat, wat bi de Bunnswehr mit den Schützenpanzer Puma allens scheef lopen is, sett sik vundaag Top-Lüüd an een Disch. Verteidigungsministersch Lambrecht kummt mit Lüüd vun de Panzer-Bo-Kunzernen tohoop. Dor achter stickt de Fraag, woans dat mit den Puma wiedergahn kann. Vör en poor Weken weren bi‘t Scheten all de 18 Schützenpanzer utfullen. De Ministersch harr dorum anseggt: Mehr Puma-Panzer warrt eerst mal nich inköfft. Un ok för de Suldaten, de för de Nato gau utrücken köönt, hett se den Puma trüchhollen.

Tunnel in Lützerath: Evakueren duert länger

Erkelenz: In de nordrheinwestfäälsche Bruunkohlengegend is de Polizei jümmers noch dorbi, all Minschen ut dat lütte Dörp Lützerath ruttohalen. Kummer maakt en Tunnel. Dor hebbt sik en Reeg Lüüd i versteken. Bi’t eerste Mal hebbt se de dor nich rutkregen. De Klima-Aktivisten wehrt sik dorgegen, dat dat Dörp för dat Afbaggern vun Kohlen afreten warrt.

Bremen: Mann drauht AOK-Mitarbeiders mit Ext

Bremen: Bi de AOK in de Bremer Binnenstadt müss güstern de Polizei oplopen. En Mann harr dor, wo de Kunnen bedeent warrt, de Mitarbeiders mit en Ext drauht. Minschen sünd nich to Schaden kamen. De Polizei kunn den Mann fastsetten. De Geschäftssteed blifft vundaag dicht.

Agentur in Cloppenborg lockt Lüüd in en Ehrenamt

Cloppenborg: De sik in den Kreis Cloppenborg in’t Ehrenamt för wat insetten will, kann de passliche Steed nu eenfacher online finnen – mit den Mit-Maak-O-Mat. Op de Internetsiet vun de Ehrenamtsagentur staht 17 Fragen. De dor Antwoort op gifft, kriggt achteran en Vörslag, wo he oder se aktiv warrn kann. Bet nu hebbt sik 50 Verene ut de Gegend opnehmen un dat, wat se söken doot, indregen laten.

Handball-WM geiht för Düütschland los – gegen Katar

Kattowitz: För de düütschen Handballers geiht de Weltmeisterschap in Polen un Sweden los. In de Vörrunn mööt se vunavend gegen Katar ran. Bunnstrainer Gislason hett seggt: In jümehr Grupp wüllt de Düütschen de Nummer Een warrn.

Dat Weer

Un woans süht dat mit dat Weer umto ut? Opstunns hebbt wi in Bremen, Bremerhaven, Bevers un Cloppenborg överall 8 Graad. Vundaag: Bet Middag treckt vun de Noordsee her Wulken ran, de ok Regen mitbringt. An’n Namiddag kaamt jümmers wedder Wulken mit Regen un Grisselgrussel dör. Den Heven kriegt wi meist gor nich to sehn. Dat Thermometer krabbelt op 8 bet 9 Graad. De Wind dorto weiht in Maten bet frisch, an de See ok däägt, vun de süüdwesten Kant. Gegen Avend dreiht he pö a pö op West. In’t Binnenland störmsche Böen, an de See ok düchtige Stormböen. Tokamen Nacht: Vele Wulken, un pladdern deit dat ok. Na Middernacht lockert de Wulken vun Westen her op. Dat Ganze bi 6 bet 5 Graad. Morgen: Eerst twüschen Werser un Elv hell un dröög. An’n Vörmiddag drängt vun Holland mehr un mehr dichte Wulken rin, un twüschen Ems un Werser pladdert dat in een Tuur. An’n Namiddag överall Wulken un Regen. Bi 9 bet 11 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Irene Lottes.