Plattdeutsche Nachrichten Plattdüütsche Narichten vun'n 15. Januar 2021

Ein rot-weißer Leuchtturm zwischen Dünen. Dahinter ein blauer Himmel mit ein paar Wolken.

Plattdüütsche Narichten vun'n 15. Januar 2021

  • Luern op noch strenger Corona-Regeln
  • Bremer CDU-Vertreder in´t Geheel för Röttgen
  • Landdagswahl in Thüringen wegen Corona verschuven
  • Biden plant gewaltg grotet Corona-Paket
  • "Mars-Mullwarp" gifft up
  • Dat Weer
Bild: Radio Bremen

Informationen zum Audio

Luern op noch strenger Corona-Regeln

Berlin. Kann angahn, dat op de Düütschen noch strenge Corona-Regeln to komen. Bundeskanzlersch Merkel plant noch mal wedder en Krisendrapen. Al in de tokamen Week will de Kanzlersch mit de Ministerpräsidenten vun de Länner över dat wiedere Vörgahn snacken. De Tallen vun de Neeinfektschoonen gahn ok in de Tied vun de aktuellen Regeln man knapp trüüch. Sorgen makt de Regerung ok, dat sick Soorten vun dat Corona-Virus utbreden, de noch anstekender sünd.

Bremer CDU-Vertreder in´t Geheel för Röttgen

Berlin. Vunavend makt CDU-Baas Kramp-Karrenbauer den eersten digitalen Parteidag vun de CDU op. Wegen de Corona-Pandemie drapen sick de 1001 Vertreder in en Videokonferenz in´t Internet. De Bremer CDU-Lannsverband hett kien Wahlvörslaag afgeven, de Vertreder könen free afstimmen. Dree vun den fief Afornten ut dat Land Bremen sünd sick eenig, dat se för Norbert Röttgen stimmen wullen.

Landdagswahl in Thüringen wegen Corona verschuven

Erfurt. Wegen de hogen Corona-Infektschoonstallen schall de Landdagswahl in Thüringen in´n April verschuven weern. Dorop sünd Linke, SPD, Gröne un de CDU in Thüringen övereens kamen. Egentlich weer de Landdagswahl för den 25. April plant. Se schall nu tosamen mit de Bunnsdagswahl an´n 26. September utricht werrn. Thüringen vermellt in Ogenblick de höchsten Tallen vun´t Ansteken. Bremen hett opstunns dorgegen de lüttjesten Weerte vun all Bunnslänner: 84 neje Corona-Fallen per 100.000 Inwahner in söven Daag.

Biden plant gewaltg grotet Corona-Paket

Washington. De tokamen US-Präsident Biden will en nejet Corona-Hölpspaket vun 1,9 Billionen Dollar snören. Dormit schall de weltwied gröttste Volkswirtschaft wedder in Swung komen. Millionen vun Amerikanern schallen en Scheck över 1400 Dollar per Person kriegen. Alleen 160 Millionen Dollar sünd för en natschonal Impfprogramm, för mehr gaue Tests un för den Utbo vun Testlabors vörsehn. Bavento will Biden 100.000 Jobs in´t Rebeet vun de Gesundheit klaarkriegen, um wat gegen de weltwiede Süük to doon.

"Mars-Mullwarp" gifft up

Köln. De, as he nöömt warrt, "Mars-Mullwarp" hett utdeent: De in Bremen utklamüüsterte Versöök mit en Bodden-Sonde för den Mars, hett wiedgahns nich klappt. Dat hett dat Ruumfohrtzentrum DLR mitdeelt. De Mars-Mullwarp weer in´n November 2018 an Bord vun de Nasa-Sonde "Insight" op den Naverplaneet vun de Eer lanndt. Egentlich schall he sick bit to fief Meter in den Marsbodden ingraven, um dor den Bodden uttospekuleren. Dat hett aver nich klappt.

Dat Weer

Un nu een Blick op dat Weer: in Vern, an den Bremer Flegerhaben un an de Fischreehabenslüüs in Bremerhaben 0 un in Nordenham sünd dat opstunns minus een Graad. Hüüt is de Heven vull vun Wulken. Enkelte Sneeschuuer sünd nicht utsloten. In´n Verloop könen de Wulken man oprieten un de Sünn kiekt en beten döör. De Wind weiht en beten, an de Küst ok in Maten. Dat Thermometer wiest en Temperatur vun minus een bet plus een Graad. Tokamen Nacht sünd neven dichten Wulkenfellern ok gröttere Oplockerungen or kloore Phasen mööglich. Hier un dor kann sick Nevel bi minus dree bet minus fief Graad billen. Morrn sünd ünnerschedlich vele Wulken an Heven, mennigmal kann de Sünn dörkamen, verenkelt sünd ok Regendrüppen or Sneeflocken bi een bit twee Graad mööglich. Sünndag: Vele Wulken, af un an Snee, later ok Sneeregen or Regen bi een bit dree Graad.

Dat weern de Nahrichten op platt. Gerrit Busch hett se tohoopstellt. Op Platt trechtmaakt un vörleest hett se Markus Weise.

Bremen Eins Livestream & aktuelle Sendung.

Der Nachmittag mit Roland Kloos

Der Nachmittag

Jetzt läuft:

Men At Work Who Can It Be Now?
  • Jetzt läuft:

    Men At Work Who Can It Be Now?