Plattdeutsche Nachrichten Plattdüütsche Narichten vun'n 14. Januar 2021

Twetet Verfahren, Trump ut sien Amt to smieten

Washington – US-Präsident Trump steiht as Erster in de Geschicht vör een twetet Verfohren, em ut’n Amt to smieten. He mutt sik in’n Senat wegen „Anstiften to Oprohr“ verantwurten, wiel sien Anhänger dat Kapitol kapert hebbt. Blangen all Demokraten hebbt ok tein Republikaner in’t Repräsentantenhuus för een nee’et Verfohren gegen Trump stimmt. Dat Urdeel ward woll nich vör dat ünner Eed nehmen vun Trumps Nafolger Biden fallen.

WHO-Facklüüd kummt in China an

Wuhan – Facklüüd vun de Weltgesundheits-Organisatschon  sünd in de chinesische Stadt Wuhan indrapen. Tohoop mit chinesischen Wetenschupplern wüllt de Experten rutfinnen, wo dat Virus nipp un nau herkummt. As se ankamen sünd, sünd de Forscher op dat Corona-Virus ünnersöökt worrn un mööt nu erst mal twee Weken in Quarantään. In de Stadt Wuhan weern vör mehr as een Johr de ersten Lüüd opdüükt, de dat nee’e Virus in sik harrn.

Vogt wahrschaut, dat Lüüd ut de Luftfohrt ehr Arbeit verleert

Bremen – Wertschuppssenatorsche Vogt hett darvör wahrschaut, dat wegen de Pandemie noch mehr Minschen in de Luft-un Ruumfohrt ehr Arbeit verleert. Vogt meent, alleen in Bremen sünd mehr as 6-dusend Städen in Gefohr – wenn dat Wertschuppsfeld nich vör 2025 na de slechte Laag wedder op de Been kummt. Vundaag all geiht velen Toleverern in de Region ahn, dat se wat darför köönt, dat Geld ut.

Röwekamp warvt för Laschet as CDU-Bunnesvörsitter

Bremen – CDU-Fraktschonsbaas Röwekamp hett sik för Armin Laschet as nee’en Bunnesvörsitter vun sien Partei stark maakt. De NRW-Ministerpräsident kann allens, wat de Volkspartei utmaakt, tohoopbringen, sä Röwekamp kort vör den CDU-Bunnesparteidag an’n Sünnabend, de in’t Internet aflöppt. Tohoop mit de CDU-Fraktschonsböversten ut Neddersassen, NRW, Thüringen un Brandenborg hett de Bremer een Verklaren för Laschet afgeven.

Holsteen-Anhänger fiert Pokal-Sieg gegen Bayern in Kiel

Kiel – Mit velen Autos, Hupen un Füerwark hebbt de Anhänger vun Holsteen Kiel den dullen Erfolg in’n DFB-Pokal gegen den dütschen Rekordmester Bayern München fiert. De Football-Tweetliga-Mannschupp harr sik gegen den Triple-Winner mit 6 to 5 in’t Olbenmeter-Scheten dörsett. Fin Bartels hett dat wichtige Tor scheten.

Dat Weer

Un nu een Blick op dat Weer: in Cuxhaben 0, an den Bremer Flegerhaben, an de Fischereehabenslüüs in Bremerhaben un in Ossenbrügg sünd dat opstunns 1 Graad. Hüüt gifft dat mal mehr, mal minner Wulken an’n Heben, de Sünn kiekt ok mal rut. Darbi blifft dat meist dröög, blots verenkelt kann dat mal natt vun baben kamen – bi 1 bit 2 Graad. Tokamen Nacht treckt vele, dicke Wulken vörbi, dat kann ok mal drüppeln. Dat Thermometer sackt op null Graad op de Eilanden un bit to 2 Graad ünner null. Morrn is de Heben faken dick wulkig, dar köönt ok een paar Snee-or Sneeregenschuers daalkamen. Vun de Nordsee her kann aver ok mal de Sünn rutkieken - bi minus 1 bit plus 2 Graad. Sünnabend vele Wulken, ok mal Sünnschien un to’n Abend hen faken dröög bi null bit 2 Graad. Dat weern de Nahrichten op platt. Carola Schwirblat hett se tohoopstellt. Op Platt trechtmaakt un vörleest hett se Heidi Jürgens.