Plattdeutsche Nachrichten Plattdüütsche Narichten vun'n 25. November 2022

Bunnsrat stimmt över Börgergeld af

Berlin. De Bunnsrat stimmt in en Drapen över dat plante Börgergeld af. De Bunnsdag hett an´n Vörmiddag den Kumpromiss ut den Vermiddelnsutschuss annohmen. Wenn de Lännerkamer ok dorför is, kann dat Börgergeld to´n Januar inföhrt weern. De betto gellen Hartz Veer –  Stütt warrt denn dormit aflöst. Dormit kriegen Millionen Minschen, de dat nödig hebbt, en högere Grundsekerung un mehr Mööglichkeiten üm sick wieder to bilden un annere Arbeiden to lehren.

Düütsche Wirtschaft wasst düchtig

Wiesbaden. De düütsche Wirtschaft is in den Sommer unvermodens düchtig wussen. Liekers dat dat de Rekordinflatschoon gifft un en poor Woren knapp weern bi de Fracht, hett dat Bruttobinnenlandprodukt twüschen Juli un September 0,4 Perzent in´n Vergliek to dat Vörquartaal toleggt. Dat vermellt dat Statistisch Bunnsamt. De Behöörd weer toeerst vun en Anwassen vun 0,3 Perzent utgahn.

Gröne kriegen för ehren Vörslag to´n Flegerhaven in Bremen Gegenwind

Bremen. De Grönen in Bremen kriegen Gegenwind för ehr Gedanken den Flegerhaben Bremen in en reinen Warkflegerhaben för Airbus un annere Ünnernehmen to maken. Passageer-Flöög schall dat denn nich mehr geven. De Vörslag steiht in den Plaan för dat Wahlprogramm, dat vunmorgen afnickt weern schall. Börgermeister Bovenschulte will dorgegen an den Passager-Flegerhaben fasthollen. Ok CDU un FDP seggt, dat de Grönen mit ehr Menen van´t Padd af sünd.

Opnahmevermögen för Kinner op de Flucht in Bremerhaben warrt knapp

Bremerhaben. Bit September wurren in Bremerhaben goot 600 Kinner un junge Lüü ut de Ukraine, de to de School gahn mööt, mellt. Dat steiht in en Bericht för den Schoolutschuss. As de Schoolstadtrat Frost vermellt, sünd de Opnahmevermögen an den Schoolen dormit binah an´n Enn. En Problem is, dat nüms seggen kann, wo lang de ukrainisch Familien in Bremerhaben blieven.

Boarbeiden op de A1 sorgen för Ümwegen

Holdrup. Autofohrers mööt vunavend op de A Een twüschen Bremen un Ossenbrügge mehr Tied inplanen. Bi Holdrup warrt an dat Wekenenn en Brügg afreten. Dat is nödig wiel de Autobahn dor op söss Sporen utboot warrt. För de Boarbeiden warrt de Autobahn vunavend bit Sünndagnamiddag heel un deel dicht makt.

Dat Weer

Un nu noch en Blick op dat Weer: in Emden acht, an’n Bremer Flegerhaben un in Bremerhaben söss un in Hude sünd dat opstunns söven Graad. Hüüt regent dat faken. An´n Namiddag kann sick de Sünn vun Oostfreesland un vun dat Emsland bit to de Weser af un an dörsetten. Regenschuer sünd aver wieder dorbi. De Wind weiht en beten bit in Maten vun de Süüd- bit Süüdwesten Kant. Dat Thermometer wiest acht bit ölven Graad. In de Nacht en poor Wulken. Dat blifft aver dröög bi dree bit söss Graad. Morn en fründlichen Mischmasch ut Wulken un en beten Sünnschien. An de Küst sünd hier un dor Regenschuer möglich. Acht bit thein Graad sünd denn op dat Thermometer to lesen. Sünndag: In´n Oosten vun de Weser Sünnschien. Vun de Westen Kant dichte Wulken. Regen gifft dat woll eerst an´n Avend. De Temperaturen liggen bi söven bit negen Graad.

Dat weern de Narichten op platt. Tohoopstellt hett se Irene Lottes. Op Platt trechtmaakt un vörleest vun Markus Weise.