Plattdeutsche Nachrichten Plattdüütsche Narichten vun'n 22. November 2022

In’n Bunnsdag fangt de Huusholtsweek an

Berlin: In’n Bunnsdag hett jüst de Huusholtsweek anfungen. In de tokamen dree Daag snackt de Afordneten över de Huusholden vun de enkelten Ressorts. An’n Freedag ward denn över den Bunnshuusholt för 2023 afstimmt. An‘n Anfang vun de Debatt stellt Finanzminister Lindner sien Huusholtsplaan vör. De heele Bunnshuusholt hett en Grötte vun 476 Milliarden Euro. De Kosten vun de Energiekrise sünd aver in en Extra-Geldputt utlagert. 

Kosten för Besöök bi’n Deertendokter stiggt

Berlin: De Besöök bi’n Deertendokter ward in Tokunft düütlich dürer. Dat liggt an de nee’en Gebührenordnung. Heime un Tafeln för Deerten sünd bang, datt sik besünners Lüüd, de wenig verdeent, den Besöök bi’n Deertendokter nich mehr leisten köönt. Mag ween un Huusdeerten verkaamt dorüm oder ward in Heime afgeven. De Bunnsraat hett in’n Juli de nee’e Gebührenordnung afnickt. Dat is dat eerste gröttere Anpassen vun de Gebühren siet mehr as 20 Johr.     

Bremer Werserbrüchen nich mehr seker noog för grode Lasten

Bremen: De dree Bremer Werserbrüchen sünd nich mehr seker noog för grode Lasten. Dat vermellt de Werser-Kurier un weet dat vun dat eerste Ergebnis, dat bi en groden Ünnersöken in’n Opdrag vun’n Bund rutsuert is. Dorüm ward de LKW-Verkehr op de Brüchen in Schranken sett. Dat Amt för Straten un Verkehr rekent dormit, datt dat Trechtmaken vun de Wilhelm-Kaisen-Brüch bet Enn 2024 duert. De beiden annern Brüchen schüllt bet Enn 2025 fardig ween.

Keen wietere Streiks bi Bremerhaben Bus

Bremerhaben: In’n Striet över en nee’en Tarifverdrag sünd sik Bremerhaben-Bus un de Gewarkschaft Verdi enig worrn. Wietere Streiks vun de Busfohrers sünd dormit vun’n Disch. Verdi snackt vun den hööchsten Tarifafsluss för den ÖPNV in Bremerhaben siet Johren. Enkelte Punkten sünd dorto aver noch nich bekannt.

Bremer Senaat snackt över Universität-Plaans in de Binnenstadt

Bremen: De Bremer Senaat snackt an’n Vörmiddag doröver, wat Deelen vun de Universität in de Binnenstadt ümtrecken schüllt. Nipp un nau geiht dat üm den Bo vun de Landsbank an’n Domshoff. Mit dat Ümtrecken schall ok mehr Leven in de Bremer Binnenstadt kamen. Toeerst weer plaant, datt de Universität in dat fröhere Huus vun de Spoorkass an’n Brill ümtreckt. De Pries för den Bo is aver to hooch.

Dat Weer

Un nu en Blick op dat Weer: In Nordholt 0, in Bremen un Bremerhaben 2, in Cloppenborg 4, op Borkum 5, un in Möppen sünd dat opstünns 6 Graad. Hüüt Vörmiddag treckt de Regen över de Elv af, un de Temperaturen stiggt över Null Graad, sodatt keen Gefohr vun Glatties mehr besteiht. An’n Namiddag is dat en Tiet lang dröög, un vun’t Ollenborger Münsterland kann dat oplockern. An’n Avend gifft dat wedder enkelte Regenschuers. Dat ward’n beten lauer as toletzt mit 3 bet 7 Graad. In de Nacht treckt bi veele Wulken ok Regenschuers dör. Af un an lockert dat op. Frost gifft dat nich bi 5 bet 2 Graad. Morgen is dat mal mehr, mal weniger wulkig mit’n beten Sünnschien. Dat blifft meisttiets dröög, blots enkelte lichte Schuers sünd mööglich. An’n Avend gifft dat na‘t Emsland rut Regen. De Temperaturen stiggt wieter op 7 bet 9 Graad.

Dat weern de Narichten op platt. Tohoopstellt hett se Katrin Martens. Op Platt trechtmaakt un vörleest vun Marc Gelhart.